euskalkultura.eus

euskal diaspora eta kultura

Albisteak rss

Bihar aurreneko aldiz ospatuko dute Puerto Madryn-en, Argentinan, 'Aralarko San Migel'-en jaia

2008/09/12

Maria Julia Ercoreca euskal etxearen sustatzaileetako bat da, duela zazpi urte Maiputik Puerto Madrynera bizitzera joan zenez geroztik (argazkian Maipuko dantza taldearekin)
Maria Julia Ercoreca euskal etxearen sustatzaileetako bat da, duela zazpi urte Maiputik Puerto Madrynera bizitzera joan zenez geroztik (argazkian Maipuko dantza taldearekin)

PUBLIZITATEA

Lehendabiziko aldia izango da Puerto Madryn-en, Argentinako Patagonian, 'Aralarko San Migel' euskal jaia ospatzen dutela. Bihar bertan izango da, egitaraua hiru ekitaldik osatzen dutela, "Etorritakoengatik" lelopean. Lehenik, goizeko 10:30etan hiriko agintariei agurra egingo diete euskal komunitateko ordezkariek, suziri eta loreekin. 11etan, omenaldia egingo zaie hiriko lehen euskal herritarrei. Gauean euskal dantzak, musika, afari tipikoa eta kantuekin jai handi bat antolatu dute. Maria Julia Erkoreka antolatzaileak adierazi duenez, "jaia arrakastatsua izatea espero da, sarrerak segituan agortu baitziren".

Puerto Madryn, Argentina. Bihar jaiegun handia izango da Puerto de Madryneko euskaldunentzat. "Aralarko San Migelen Jaia" aurrenengo aldiz ospatuko du bertako Euskal Gizataldeak eta ekitaldi batzuk antolatu dituzte omen egiteko. Jaiari "Etorritakoengatik" izena jarri diote eta Puerto de Madryn-era iritsitako lehen euskaldunak gogoan hartu nahi ditu. Ekitaldia sortzen eta osatzen ari den bertako euskal etxe gazteak antolatu du, eta Puerto de Madryn-eko udalaren laguntza jaso du. Euskal elkartea gaztea izan bai, baina jendea biltzeko ahalmen polita duela erakutsi du, izan ere jaialdirako prestatu ziren 350 sarrerak agortuak dira jada.

Jaia goizeko 10:30etan hasiko da; hiriko agintariak agurtuko dituzte euskal komunitateko ordezkariek, horretarako suziriak jaurti eta loreak banatuko dituztelarik. 11etan, hiriko lehenengo euskal herritarrei (70 lagun inguru) omenaldia egingo diete Madryneko Portal-ean. Gauean, jaialdi bat antolatu dute eta euskal dantzak, musika, afari tipikoa eta kantua izango dituzte. Gauak luzerako emango duela uste du jaiaren antolatzaile Maria Julia Erkorekak, deialdiak izan duen arrakasta kontuan izanda jendea gogotsu dagoela uste dutelako. 710. eskolako SUM-en ospatuko den gaueko jaialdiaren barruan "Anaitasuna" eta "Los Txikis" soinujoleak, trikitixa eta Necocheako "Osasuna Otxotea" izango dira.

 



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia