euskalkultura.eus

Galdakao, Bizkaia. Dena prest dago Euskal-Venezuelarren XVII. Urteroko Topaketarako eta larunbat honetan Galdakaon bilduko dira Euskal Herrian bizi baina herrialde hegoamerikarreko Diasporarekin harreman estua duten 60 bat lagun. Gehienak han jaioak edo bizitakoak dira, eta Euskal Herrira itzuliak; beste batzuk Euskal Herrian oporretan dauden Venezuelako euskaldunak, eta zenbaitzuk Caracasen, Carabobon... senitartekoak dituztenak. Urtero biltzeko ohitura politari sendo eutsi dio taldeak, eta ohi bezala, emozioz beteriko topaketa izango da.

Aurten antolatzaileek, Amaya Zenarutzabeitia buru, arazo logistiko batzuei aurre egin ondoren, jatetxea erreserbatzeko arazoak zirela eta, deitu dute jada bilkura. Hitzordua larunbat honetan izango da, eguerdian, Galdakaoko Somera kalean (ofizialki, kalearen izena Gipuzkoa da, baina). Hasteko, herriko tabernetan barrena poteo txiki bat egingo dute partehartzaileek, horrela elkar agurtzeko tartea izango dute aspaldiko lagunek eta senitarteek.

Ondoren, Galdakaoko Batzokira joango da taldea eta, bertan, goiko solairuan, egingo da urtean zehar zendu diren taldeko kideen oroimenezko meza, 14:00tan. Aurten gogoan izango dira, besteak beste Lurdes Basañez, Ibon Doxandabaratz, Maricarmen Endaia, Agustin Etxabe, Gines Anaia, Milagros Flaviano eta Dei Urresti.

Mezaren ostean, 15:00ak aldera, hasiko da bazkaria. Aurten menua "erdi venezuelarra, erdi euskalduna" izango da, Amaya Zenarutzabeitiak EuskalKultura.com-i azaldu dionez: 'txerri pernila' izeneko jaki tipikoa, entsaladila, zainzuriak, legatza eta entrekota. Menuaren prezioa 35 eurokoa izango da, kafea barne.

Dagoeneko 60 lagunek izena eman dute baina, antolatzaileek azaldu dutenez, bada oraindik azken orduko partehartzaileentzako lekurik. Erreserba egiteko, bidali e-maila Amayari, hona.