euskalkultura.com

euskal diaspora eta kultura

Albisteak rss

La Platako Unibertsitateak eta hiriko Euzko Etxeak 'Nomadak TX' eskainiko dute gaur zine ziklo barnean

2010/10/22

Emilia Bastida, La Platako euskal zine-kafe zikloaren lehenengo filma, Obaba, aurkezten, joan den abuztuan.
Emilia Bastida, La Platako euskal zine-kafe zikloaren lehenengo filma, Obaba, aurkezten, joan den abuztuan.
Zine-kafe zikloa gautzen ari da La Platako Euzko Etxean bertako Unibertsitateko Gogoetarako Euskal Katedra Askea eta euskal etxeko 'Matxin Burdin' Liburutegia antolatzaile. Gaur bertan izango da zikloaren bigarren topaketa eta bertaratzen direnek txalapartari buruzko 'Nomadak TX' dokumentala ikusteko aukera izango dute. Proiekzioa arratsaldeko 7etan hasiko da, euskal etxeko egoitzaren lehenengo pisuko aretoan.

PUBLIZITATEA

La Plata, Argentina. "Proposamenaren helburua euskal zinea eta oro har kultura zabaldu eta erakustea da", azaldu diote ekintzaren antolatzaileek EuskalKultura.com-i. "Asmo horrekin hasi ginen abuztuan euskal literaturan klasiko bat bilakatu den eleberri baten zinemarako egokitzapenarekin, Bernardo Atxagaren lanean oinarrituta Montxo Armendariz-ek zuzendutako 'Obaba'rekin alegia, eta oraingoan, aldiz, 'Nomadak TX', musikaren bidez euskal kultura, munduko beste kultura batzuekin nola batzen den islatzen duen dokumentala aukeratu dugu”.

Filmak aurkezteko ardura Euzko Etxeko 'Matxin Burdin' liburutegiko kide eta zine ikaslea den Emilia Bastidarena da. Izenburuak ikusteaz gain, kultur ekintza honekin lagunen arteko kafetxo bat ere konpartituko dute.

La Platako Unibertsitateko Gogoetarako Euskal Katedra Askea eta euskal etxeko 'Matxin Burdin' Liburutegia dira zikloaren bultzatzaileak eta hiriko komunitate osoari luzatzen diote gonbitea. Gaurko saioari dagokionez, 'Nomadak TX' dokumentala da eskainiko den lana eta ikusteko eta komentatzeko hitzordua, arratsaldeko 7etan, euskal etxean bertan.



« aurrekoa
hurrengoa »

Erlazionatutakoak

Irakurrienak

Azken komentarioak

© 2014 BasqueHeritage S.L.

Portuetxe 51, 201. bulegoa
20018 Donostia / San Sebastián
Tel: (+34) 943 504477 / (+34) 943 316170

jaurlaritza gipuzkoa bizkaia