euskalkultura.com

euskal diaspora eta kultura

Albisteak rss

Kirmen Uribe idazleak “Bilbao-New York-Bilbao” eleberriaren ingelesezko itzulpena aurkeztuko du Ingalaterran

2014/10/14

Kirmen Uribe idazlea
Kirmen Uribe idazlea

PUBLIZITATEA

Ingalaterran da aste honetan Kirmen Uribe idazle ondarroarra, bertan aurkezteko "Bilbao-New York-Bilbao” eleberriaren ingelesezko itzulpena. Seren Books argitaletxeak plazaratuko du itzulpen hori, datorren astelehenean, Elizabeth Macklin estatubatuarrak zuzenean euskaratik itzulia. Bihartik aurrera Oxforden eta Londresen zenbait aurkezpen egingo ditu Uribek. Bestalde, Aingeru Epaltza idazlea Finlandian da, eta gaur Helsinkin aurkeztuko du “Rock’n’Roll” eleberriaren suomierazko itzulpena.

Donostia-San Sebastian. Kirmen Uribe idazleak bihar aurkeztuko du Oxfordeko Unibertsitate ezagunean "Bilbao-New York-Bilbao" eleberriaren ingelesezko itzulpena. Ondoren, ostegunean, Londreseko King's College unibertsitatean egingo du aurkezpena eta ostiralean hiriburuko "The Free Word" gunean irakurleei aurkeztuko die, Mick Felton editorarekin batera. Bira larunbatean amaituko da, "The Language Show" hizkuntz-azokaren baitan. Han ikusgai izango da Jon Garaño zuzendariaren “Urrezko eraztuna” film laburra, Uriberen izen bereko olerkian oinarritua. Horrez gain, Uribek “Bitartean heldu eskutik” olerki-liburutiko poemak irakurriko ditu. 

Bira honek Etxepare Euskal Institutuaren sostengua du. Informazio gehiago, hemen

Epaltza Finlandian

Bestalde, Aingeru Epaltza idazle nafarra Finlandian da, bertan aurkeztuko baitu “Rock’n’Roll” eleberriaren suomierazko itzulpena. Gaur Helsinkiko Liburutegi Nagusian solasaldia egingo du Epalzak irakurleekin, Ouli-Minna Elgorriaga-Piippo itzultzailearen laguntzarekin. Bihar goizean, idazleak Helsinkiko Unibertsitateko euskara ikasleekin topaketa egingo du.

Amaitzeko, esan Harkaitz Cano idazlea ere atzerrian dabilela, Irlandan zehazki, bere lanak nazioartean ezagurarazten. Ostiralean Cork-en irlandar idazleekin batera literatura topaketa batean parte hartuko du, eta asteburuan Dublingo Isla Jaialdian.



« aurrekoa
hurrengoa »

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.com

jaurlaritza gipuzkoa bizkaia