euskalkultura.eus

euskal diaspora eta kultura

Albisteak rss

'Joanes, the Basque Whaler' komiki euskal-amerikarra uztailean salgai Renoko Nabo Convention bilkuran

2009/06/11

Guillermo Zubiaga marrazkilaria New Yorkeko estudioan
Guillermo Zubiaga marrazkilaria New Yorkeko estudioan

PUBLIZITATEA

'Joanes, the Basque Whaler' AEBetako euskal komunitatean sortu den lehen komikia da. Bere egilea Guillermo Zubiaga da, New Yorken bizi eta Marvel Comics enpresarentzako lana egiten duen marrazkilari bizkaitarra. Berak izan zuen Ameriketako euskal baleazaleen abenturak marrazki bihurtzeko ideia, Joanes pertsonaiaren bitartez. Orain, Nevadako Unibertsitateko Center for Basque Studies erakundearen laguntzarekin, 1.000 aleko lehen tirada bat jarriko du salgai --ingelesezko bertsioan-- AEBetako euskal etxeek Renon egingo duten NABO Convention bilkuran, uztailaren 25ean.

New York, AEB. Datorren uztaileko 25ean Renon egingo den NABO Convention bilkura izango da Guillermo Zubiaga marrazkilari euskal-newyorktarraren  'Joanes, the Basque whaler' komikiaren aurkezpenaren agertokia. North American Basque Organizations (NABO) erakundearen bilkuran AEBetako --eta Kanadako-- euskal etxeetako ordezkariak bilduko dira eta, asteburuan Renoko Zazpiak Bat elkartearen urteroko Euskal Jaialdia ere egingo denez, publikorik ez zaio faltako komiki berriaren agerpenari.

Joanes pertsonaiaren oinarrian haragizko pertsona bat dago: Joanes de Etxaniz, Orioko baleazale bat. Etxaniz 1584ean hil zen Kanadan eta bere testamentua herrialde horretako dokumentu idatzi zaharrena da. Guillermo Zubiaga istorio honetan oinarritu zen bere pertsonaia sortzeko eta garai zirraragarri haiek islatzeko. Zubiagaren ustetan euskal baleazaleen esperientzia 'euskal historiaren alderdi epikoa da, AEBetan cowboyak diren bezala, Norvegian vikingoak edo Japonian samuraiak', azaltzen du.

Renoko CBSaren laguntza

Komikiak Renoko Unibertsitateko Center for Basque Studies (CBS) erakundearen laguntza jaso du 1.000 aleko lehen tirada bat egiteko ingelesezko bertsioan. Egilearen ametsa lana euskaraz eta gazteleraz ere argitaratzea da, horrela Joanesen istorioa Euskal Herriko irakurle gazteengana ere hel dadin. 

Renoko NABO Convention-en barruan egingo den aurkezpena komikiaren sorkuntza prozesu eta marrazki originalen erakusketa batekin hasiko da uztailaren 20tik 26ra. Ostiralean, uztailaren 24an, Zubiagak bere lanari buruz hitzaldi bat emango du eta, azkenik, uztailaren 25ean, larunbatean, komikiaren lehenengo 1.000 aleak jarriko dira salgai. 

NABO Convention-eko behin-behineko egitarau osoa, hemen.

 



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia