euskalkultura.eus

Vitoria-Gasteiz. Lehendakaritzara heldu zenetik urtero antolatu du Lopezen administrazioak atzerrian bizi diren euskal herritarrei eskainitako eguberri garaiko harrera-ekitaldi hau eta aurten, izan ere, 26an, astelehenez egingo da, Gabon egunaren biharamunean, aurrekoetan bezala Lehendakaritzaren egoitzan, arratsaldeko sei t'erdietan, bertara kanpoan bizi diren eta egun horietan Euskadira eguberri-jaiak pasatzera etorri eta parte hartu nahi duten herritar guztiak gonbidatuta daudela.

Karia hortara Kanpoan Bizi diren Euskal Herritarrentzako eta Gizataldeentzako zuzendari den Julian Celayak milaka email zuzendu dizkie bere bulegoarekin harremanetan dauden herritarrei zein munduko euskal etxe eta federazioei, eta Euskadiko Ordezkaritzetatik ere eskaintza bera zabaldu zaie atzerrian bizi diren euskal herritarrei, ekitaldian parte hartu nahi izanez gero euskaldunak.kanpoan@gmail.com helbidera idatzi eta hala baiezta dezaten, euren izen-deiturak, NAN eta telefono zenbakia eta bizi diren herri zein herrialdea adieraziz. Ondoren, izena emandako pertsonek ekitaldirako gonbidapen ofiziala jasoko dute.

Aurreko urteetan gertatutakoari jarraiki, atzerrian lanean ari diren hainbat arlotako profesionalak espero dira ekitaldian, enpresa, finantza, kultura, unibertsitatea, osasuna eta kooperazio arlotakoak besteak beste, eta baita euskal etxeetako eta Diasporako partaide eta ordezkariak ere.