euskalkultura.eus

Asuncion, Paraguai. Euskara eskolak astean behin ematen dira Asunciongo Euskal Etxean, astelehenetan, gaueko zazpi t'erdietatik bederatziak arte. Irakaslea Jesus Nazabal Jaka da, joan den abenduaren 30ean 69 urte bete zituen berastegiarra, horiuetarik 39tik gora Paraguain.

[Jesus Nazabal berastegiarra Jasone Euskal Etxean euskara eskolak ematen]

Eskoletan parte hartzen duten ikasleen artean aipa daitezke Galo Egüez, Alberto Urrutia, Ramón Cueto, Arturo Sasiain, Cristina Sasiain, Héctor Izaguirre, Carlos Vera eta Ana María Añazco, horiei geroago Macarena Ramos Sasiain bildu zitzaielarik.

[Joan den urrian euskara eskolak hasi zituzten ikasleak]

Hizkuntza ikasteaz gain, ikastaroko parte direnek euskal kultura orokorra eta euskal geografiari buruzko jakingarriak ere eurenganatzen dituzte, Euskal Herriko lurralde, eskualde eta herrien inguruko xehetasunak eta bakoitzaren arbasoak nondik etorri ziren ikasiz.

[Euskara eskolen osagarri, irakaslea Euskal Herriko geografiaz ere mintzatzen zaie, bertako herriei buruzko ezagutza orokor bat emanez]

Bestalde, Jasone Euskal Etxetik adierazi dute euskal elkarteko bazkide eta ordezkari talde batek parte hartu zuela abenduaren 5ean, Asunciongo Catalonia jatetxean, euskal, andaluziar eta kataluniar platerak partekatuz antolatu zen topa-egite batean, Espainiako estatuko komunitate horietako eta egoiliar espainiarrak gonbidatu ziren Eguberri eta Urte Berri saio batean.

[Euskal ordezkarien txanda Catalonia jatetxean egindako ekitaldian]

Elkarretaratzeak afari handi bati eman zion bidea, Asunciongo Andaluziako Etxea, Casal Catalana eta Euskal Etxeko buruzagiak bertan zirela, komunitate hauetako bakoitzak bere plater tipiko sorta bat ekarri zuela. Euskaldunen kasuan, euskara ikasleetako batzuk koru moduko bat osatu eta euskal eguberri-kantuak prestatu eta kantatu zituzten, hala nola Hator hator. Andaluziako Etxeko kide batek gitarra hartu eta aire andaluziarrak jo eta kantatu zituen.

[Euskal partaideek 'bi euskaldun, koru bat' dioen esaera baieztatu zuten]

Paraguaiko hiriburuko Euskal Etxeak lerro hauen aukera baliatu nahi izan du eskerrak emateko ekitaldian parte hartu zuten guztiei. Afariaren ondoren, zozketa batzuk egin ziren bertaratu zirenen artean.