euskalkultura.eus

euskal diaspora eta kultura

Albisteak rss

Eusko Legebiltzarburuak pobreziaren aurkako ituna sinatu du Erroman; ondoren New Yorkera bidaiatuko da

2008/10/06

Izaskun Bilbao eta Marina Ponti hitzarmena sinatzen
Izaskun Bilbao eta Marina Ponti hitzarmena sinatzen

PUBLIZITATEA

Eusko Legebiltzarreko lehendakari eta Europako Eskualdeetako Parlamentuen Batzarreko buru den Izaskun Bilbao Erroman da gaur. Bertan eskualdeetako parlamentuen izenean Nazio Batuen Pobreziaren Aurkako Kanpainarekin lankidetza hitzarmena sinatu du. Ondoren, Izaskun Bilbaok New Yorkera bidaia egingo du eta bertan, beste hitzorduen artean, euskal komunitatearekin bilduko da eta Josune Amunarriz artista hondarribitarraren erakusketa baten inaugurazioan parte hartuko du.

Erroma, Italia. Izaskun Bilbao Eusko Legebiltzarreko eta Europako Eskualdeetako Parlamentuen Batzarreko lehendakariak hitzarmena sinatu du gaur Erroman Marina Ponti Nazio Batuen Milurterako Helburuen Kanpainako arduradunarekin. Akordio honen bidez Euro Eskualdeetako parlamentuek laguntza eskainiko diote kanpaina honi. Kanpainaren helburuak pobreziaren aurka lan egitea eta munduko herri azpigaratuetako biztanleen bizi baldintzak hobetzea dira, besteak beste.

Honezaz gain Erroman Bilbaok bilera bat egingo du Gherardo Casini, Nazio Batuen Gizarte eta Ekonomi Arazo Sailaren baitango Parlamentuetarako Teknologia Berrien Nazioarteko Egitasmoko arduradunarekin.

New Yorkeko euskaldunekin

Italiako hitzorduak bete ostean Bilbaok Ameriketarako bidea hartuko du eta New Yorkera joango da. Han bertako euskaldunekin bilduko da bihar bertan New Yorkeko Eusko Etxean. Europako Eskualdeetako Parlamentuen Batzarren arloko hainbat bilera eta hitzordu izateaz gain, Bilbaok Josune Amunarriz artista hondarritarrak Sagar Handiko Reina Sofía Institutuan izango duen erakusketaren inaugurazioan parte hartuko du.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia