euskalkultura.eus

Boise, AEB. Bizkaiko lau sukaldari ospetsu izan dira joan den astean protagonista Boisen euskal sukaldaritza moldeei eskaini zaion programan, hiriburu idahotarrean egoitza duen Cenarrusa Fundazioa eta Bizkaiko Foru Aldundiaren eskutik. Sukaldariak Zornotzako Boroa jatetxeko Jabier Gartzia, Bilboko Zortzikoko Daniel Garcia, Gernika-Lumoko Zallo Barri Iñigo Ordorika eta Getxoko Jolastokiko Sabin Arana izan dira. Eurekin batera, eta ardoen ardurarekin, Mikel Garaizabal Pildain ibili da Boisen, Bizkaiko eta Euskal Herriko gastronomiaren argazki osatua eskaintzen.

Sei eguneko egonaldian, astearte izan zuten hastapen-egun publikoa Bizkaiko gonbidatuek, egun horretan Bizkaiko Txakolinari buruzko aurkezpen saio bat eman baitzuen Mikel Garaizabalek, euskaraz eman ere, bertako euskal lagunek ingelesa itzultzen zituztelarik bere hitzak.

Asteazken eta ostegunean, sukaldaritza klaseak Boise Estatu Unibertsitateko (BSU) Sukaldaritza Arteen Institutura pasatu ziren, etxean presta daitezkeen platerak eta errezeta ezagun eta 'errazagoak' hizpide, Euskal Herriko sukaldeetan gehien erabiltzen diren teknika eta moduak azalduz, asteazkenean; eta ostegunean, egungo euskal sukaldariek erabiltzen duten 'hutsean'go teknika eta beste modu sofistikatuagoak azaldu zirelarik. Boiseko KTVB Channel 7 telebista ere bertaratu zen, eta berria gaueko albistegian islatu zen.

Baina sukaldariek atseden handirik ez zuten izan, besteak beste prentsa, irrati eta telebistentzako elkarrizketa ugari eman behar izan baitute. Gauza bitxien artean, Boiseko suhiltzaileentzat kozinatu zuten, eta suhiltzaileen sukaldariekin aritu ziren, hauek aho zabalik utzita euskaldunek irakatsi eta erakutsi zizkieten sukalde moldeekin.

Aste bururatzeko, larunbatean Boiseko Euskal Etxean 180 pertsonentzat zerbitzatutako afaria zinez arrakastatsua bilakatu zen, sarreragatik ordaindutakoa Cenarrusa Fundazioaren lanetarako izanik. Afari didaktikoa izan zen, hainbat azalpen emanez sukaldariek eta sumillierrak platera eta ardo eta txakolin bakoitzaz.

Ekitaldion koordinatzaile izan den Gloria Totoricaguenaren esanetan, arrakasta ikusirik, baliteke berriro ere halakorik egitea, eta nolanahi ere Cenarrusa Fundazioa ari da euskal kulturari lotutako ekimen gehiago prestatzen.