euskalkultura.eus

euskal diaspora eta kultura

Albisteak rss

Iruñeak datorren urtea arte agurtu zituen jaiak, baina Diasporan Sanferminen oihartzunak darrai

2008/07/15

Euzko Etxeako dantzariek erakustaldia eskaini zuten La Platako Moreno plazan
Euzko Etxeako dantzariek erakustaldia eskaini zuten La Platako Moreno plazan

PUBLIZITATEA

Gauerdiarekin batera iruindarrek 2008ko Sanferminen bukaera aldarrikatu dute, penaturik eta 'pobre de mi' kanta ezaguna abestuz. Jai gogoarekin gelditu direnentzako kontsolamendu bakarra datorren urteko jaietarako denbora gutxiago falta dela pentsatzea izango da, baina euskal Diasporatik oraindik ere nazioartean ezagunak egin diren jai hauen irudiak eta ekitaldien lekukotasunak heltzen zaizkugu. Argentinan, adibidez, asko izan dira jaiarekin bat egin duten euskal etxeak.

Buenos Aires, Argentina. Diasporako hainbat euskal etxetan azken asteotan Sanferminak ospatu dira, areto eta plazak gorriz eta zuriz jantziz. Argentinan, adibidez, Concordiako Euskal Kolektibitatea izan zen jai lehenago hasi zuenetakoa eta uztailaren 2an eta 5ean bi bazkari herrikoi antolatu zituzten. Buenos Airesen, aldiz, Euskaltzaleak, Eusketxe eta Ekin erakundeek laurogei bat laguni ireki zizkieten tabernako ateak pasa den ostiral gauean. Sekula Iruñeako jaiaz gozatzeko aukera izan ez dutenentzat afariaren aurretik Itziar Tresek eta Carlos Jiménezek, etxeko bi lagun nafarrek, San Ferminei buruzko mintzaldi elebiduna egin zuten. Itziarrek euskeraz azaldu zuen nolakoak diren jai tradizional hauek eta nola bizi dituzten iruñarrek  eta, Carlosek erdarara itzuli zituen bere hitzak.

“Iruñeko San Ferminetako egun bat kontatzeko, -- hasi zen Itziar – esan dezakegu goizeko zazpietan jendea Dianarekin esnatzen dela eta goizeko zortzietan entzierroa daukagula. Zortziehun metrotako ibilbidea egiten dute sei zezenek eta sei mantsok. Eguerdian, berriz, erraldoiak, txarangak, herri kirolak, euskal dantzak eta horrelako ikuskizunak ditugu. San Ferminetan oso garrantzitsuak dira laguntaldeak edo peñak. Peñak, berez, XIX. mendean jaio ziren aurretik ere koadrila txiki batzuk ere baziren. Gaur egungoek ez dute zer ikusirik haiekin, izan ere, berrehun, hirurehun bazkide osatutako elkarteak dira eta helburua errebindikazioa da. Gaur egun hamasei peña dira. Arratsaldean zezen-plazara joaten dira eta batzuetan zaila da ikuskizuna zein den jakitea, plazan gertatzen dena edo peñek egiten dutena gradetan”.

San Fermin Eusketxe 2008 II
[Itziar Tres eta Carlos Jimenez Euskaltzaleakek, Eusketxek eta Ekinek Buenos Airesen egin zutn ekitaldian]

Bukatzeko, Nafarroako lagunek Iruñeko Sanferminetan egiten diren beste ekintza batzuk aipatu zituzten: “Beste ekintzen artean, zezen suzkoa delakoa eta suziri lehiaketa daude. Lehiaketan Valentziatik, Portugaletik, Italiatik eta leku askotatik etorritako taldeek parte harten dute. Hamalauean jaia Pobre de mí abestiarekin amaitzen da”. Hitz hauen ondoren ikusleek jaiaren bideo bat ikusi ahal izan zuten. Tabernako arduradunek babarrunak prestatu zituzten gau berezi honetarako eta gonbidatuak ordu txikiak arte geratu ziren, jolasetan eta dantzetan parte hartzeko.

Dantza erakustaldia La Platan

Buenos Aires probintziako hiriburuan, La Platan, ospakizunak joan den igandean izan ziren, Nuestra Señora de Guadalupe Parrokian eskaini zen mezarekin. Gero, 11:30etan Moreno Plazan elkarteko dantza taldea aurkeztu zen eta euskal etxeko lehendakariak, Javier Cluak, Gernikako arbolaren kimuaren omenezko hitz batzuk egin zituen. Eguerdi aldera, euskal etxean bertan txupinazoa egin eta lehendakariak beste mintzaldi bat eman zuen. Ondoren gonbidatu guztiek bai Argentinako bai Euskal Herriko ereserkiak abestu zituzten. Jarraian, bazkideek eta lagunek Toki Alai aretoan bazkaldu zuten, eta Euzko Etxearen aspaldiko argazkiak ikusi zituzten power point baten bidez. Arratsaldean, dantza talde guztiek apartako ikuskizuna oparitu zieten gonbidatuei eta, jaiarekin bukatzeko, Andre-azpibatzordeak pastelak eta txokolatea saldu zituen.

San Fermin La Plata II 2008
[La Platako Euzko Etxeako dantzariek eskaini zuren erakustaldiaren irudi eder bat]



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia