euskalkultura.eus

Rosario, Argentina. Ordutegiarekin izandako desadostasuna dela eta, Rosarioko Zazpirak Bat Euskal Etxearen iritzi eta pentsamoldeen adierazle den 'Euskaldun hitza' irratsaioa Radio Nacional-eko programaziotik atera zen otsailean. Arazoak gorabehera, aurrera segitu zuten rosariotarrek proiektuarekin, azken bi hilabetetan internetetik zuzenean transmititzen.

Bitartean, beste irrati batzuekin egindako kudeaketek emaitza onak izan zituzten eta apirilean Rosarioko euskaldunek ekoizten duten entzunaldia dialera bueltatu da. Atzotik aurrera 'Euskaldun hitza-Palabra de Vasco' FM Latinan, 94.5 frekuentzian entzun ahal izango da asteazkenero eguerdiko 12etatik ordu 1era. Astero, saioa errepikatuko da AM Libertad-en, 1100 Khz frekuentzian, ordu 1etik ordu 2etara, baina igandeetan. Aukera hauetaz gain, euskal etxeko web orrian --www.zazpirakbat.com nahiz programakoan www.palabradevasco.com.ar-- ere egongo da eskura euskal gaiei buruzko programa.

Baina egoitza berria ez Luis Maria Barrandeguyk eta laguntzaileek duten nobedade bakarra. Teknologia berriei esker, programaren irudiak ikusi ahal izango dira interneten.

Etxe berrian baina betiko izpirituarekin Euskal Herriarekin lotura duten hainbat elkarrizketa, berri, musika eta lagunen arteko mintzaldi izango dira ziklo berri honen protagonistak. Galderak, zalantzak, iradokizun eta iruzkinak utzi nahi dituenak, saioaren arduradunekin jar dezake kontaktuan telefono honetara: 54 341 530 0977.