euskalkultura.eus

Trenque Lauquen, Argentina. Joan den urriaren 15ean burutu zen Trenque Lauquen-en Urdaiazpikoaren Jaia. Hitzordua, Barrio Alegre Klubean izan zen gaueko 10etan. Festaren hirugarren edizio honetan ere, euskal etxeko kideek berek atondu eta prestatutako jakiak eskaini zitzaizkien gonbidatuei, tartean, etxeko urdaiazpikoa, txerrikiak, entsalada eta tartak. Edariei dagokienez, nobedade bat aurkeztu zuten antolatzaileek, San Juango ardoa zuzenean kupeletik zerbitzatu baitzen.

[Bostehun bat lagun bildu ziren III. Urdaiazpikoaren Jaian (argazkiaEE)]

Jatekoaz gain, ikuskizun bat ere partekatu ahal izan zuten lagunekin Barrio Alegre Klubera hurbildu zirenek. Bere sketch eta 'antzeratzeekin', Beto Moya umoristari egotzi zitzaion gauari barre algara batzuk ateratzeko ardura. Eta lortu zuen, nonbait, aldarte ona gailendu baitzen ekitaldiaz. Izan ere, poz-pozik eskuratu zituzten sariak zozketen irabazleek. Felipe Arrastuak urdaiazpikoa bereganatu zuen eta Claudia Fernandez Quintanak San Luis probintziako Merlora joateko bi txartel.

Jaiaren biharamunean --  hau da, urriaren 16an -- Amaren Eguna ospatzen zenez Argentinan, euskal etxeko dantzariek krabelinak oparitu zizkieten festan parte hartu zuten ama guztiei.