euskalkultura.eus

Elizondo, Nafarroa. 50. eta 60. hamarkadetan Ipar Ameriketara lanera joan ziren artzainek omenaldia jasoko dute igande honetan Elizondon, Ameriketako Artzainen Bestaren 3. edizioan. Iaz Alduden eta Gernikan egin zen jaia, eta orain dela bi urte Lesakan, eta bi deialdiak oso arrakastatsuak izan ziren. Aurten Elizondora zazpiehun bat lagun bilduko direla uste dute antolatzaileek. 

Besta Elizondoko Santiago elizan egingo den mezarekin hasiko da eta ondoren artzainek artalde bat gidatuko dute herriko kaleetan barrena, Foruen plazaraino. Hemen Ameriketako artzainen kanpamendu tipiko bat jarriko dute, artzainen bizilekua ziren karrokanpo eta guzti. Kanpamendu honetan bisitariek artzainen bizimodua ezagutu ahal izango dute: ardiei ilea moztu, ogia eta janaria lurrazpian egindako labe batean prestatu... 

Eguerdian partehartzaileek bazkari herrikoia egingo dute frontoian, dantzariek eta Jalisko Band taldeak girotuta. Bazkalostean zozketak egingo dira, tartean AEBetarako bi lagunentzako bidaia bat. Egunari bukaera emateko Baztan, Zugarramurdi eta Urdazubiko artzainen esperientziari buruzko liburuaren aurkezpena egingo dute.

Topaketaren antoltzaileak Baztango Udala eta Artzain Mundua elkartea dira. Bestak Nafarroako Gobernuaren eta Udalbideren laguntza du eta BBK, Iberia, Kaiku eta Lesakako Udalaren babesa.