Iban Zaldua eta Mari Jose Olaziregi euskal hizkuntzaz eta literaturaz ariko dira gaur eta bihar Bolonian

2012/03/19

Iban Zaldua idazle euskalduna

PUBLIZITATEA

Boloniako Unibertsitateak "España plural" izeneko mintegia egingo du gaur eta bertan, gaztelania, katalana eta galegoarekin batera, bere lekua izango du euskarak ere. Unibertsitateko Atzerriko Hizkuntza eta Literatura Sailak antolatu du mintegia espainiar estatuko hizkuntz aniztasuna aztertzeko helburuarekin, Artea, Historia eta Hizkuntzalaritzaren ikuspegitik. Topaketan euskal ordezkari izango dira Etxepare Euskal Institutuko Euskararen Sustapenerako zuzendari Mari Jose Olaziregi eta Iban Zaldua idazlea.

Bolonia, Italia. Gaur hasiko da Boloniako Unibertsitatean hizkuntza eta literaturari buruzko "La España plural" mintegia. Bertan estatu espainiarreko kultur-aniztasuna izango dute mintzagai nazioarteko zenbait adituk, eta euskara, katalana, galegoa eta gaztelaniaren gaur egungo egoera, historia eta kultur ekoizpena aztertuko dituzte, besteak beste.

Mintegian egongo den euskal ordezkaritzak gaur bertan izango du lehen hitzordua, Etxepare Euskal Institutuko Mari Jose Olaziregik emango duen hitzaldiarekin. Olaziregik prestatu duen txostenaren izenburua honakoa da: "Elkanoren bidean: euskal hizkuntza eta kultura munduan". Arratsaldean "Hizkuntzen eta kulturen sustapena" gaiari buruzko mahainguru batean hartuko du parte Olaziregik.

Bihar, aldiz, Iban Zaldua idazleak hartuko du euskal lekukoa. Goizean Zaldua literaturari buruzko mahainguru batean arituko da, Ricardo Menéndez Salmón eta Jordi Puntí egileekin batera.

-Mintegiari buruzko egitarau osoa, hemen