Martin Berasategiren urratsa Asian: astelehenean zabaldu zuen Shanghain 'Restaurant Martin' jatetxea

2009/09/30

Estilo kolonialeko eraikin dotore honetan zabaldu du Martin Berasategik Shanghaiko bere jatetxea. Euskal sukaldaritzak ordezkari gorena lortu du hirian. Bertako barrak pintxoak ere izango ditu.

PUBLIZITATEA

Hiru Michelin izar dituen Martin Berasategi euskal sukaldari ospetsuak jatetxe berria zabaldu du joan den astelehenean, Espainiako estatutik kanpo irekitzen duen lehena, non eta Shanghain, Txinako hiriburu ekonomikoan. Irailaren 28an [txinatar egutegiaren arabera oparotasuna eta zorte ona ekarriko duten faktoreak biltzen dituen eguna] ateak irekita, bere euskal sukaldaritza --eta baita pintxoak ere-- dastatu nahi dituenak badu bertan biltoki polita. Hirurogei pertsona dauzka lanean --gehienak bertakoak-- eta sukaldeburu gisa Maxime Fanton eta Yago Marquez gazteak, luxuzko eraikin eta inguru lakudun eder batek lagunduta lanean. A, eta pintxo barra ere badauka.

Shanghai, Txina. Astelehenean inauguratu berria den Restaurant Martin-en eskaintzen diren menuak Berasategik Lasarten (Gipuzkoa) duen jatetxean asmatutakoak dira, nahiz eta bistan denez Shanghain aurki daitezkeen barazki, haragi eta arrainek ere izango duten zeresanik. Jatetxera hurbiltzen denak, esan ahal izango du Berasategiren etxean dagoela, baina izango du baita ere Txinan eta Asian dagoela esaten dioten adierazgarriak, eta topatu ahal izango ditu, esaterako, Japoniako ostrak, idia, australiar arkumea edo txinatar txerrikumea bezalako platerak. Sukaldariaren beraren hitzetan, "bertako gustuetara hurbiltzea gauza ona da", baina "gure sukaldearen oinarria galdu gabe."

Jatetxe berria estilo kolonialeko 1921eko frantziar etxe dotore batean dago kokatua, Xujiahui parke ezagunaren bihotzean laku batek inguratuta; eraikina, izan ere, bere edertasuna eta singulartasunarengatik da ezagutua. Egin dioten birmoldaketaren ondoren, barrualdea argitsuagoa geratu da eta lau solairu, taberna, terraza eta jangela baditu, bezeroak egunero atenditzeko. "Bai, pintxoak ere zerbitzatzen ditugu, barrako menuan hain zuzen", argitzen dute jatetxetik.

Hamabost sukaldarik eta hirurogei bat langilek oro har, gehienak txinatarrak, ari dira bertan lanean, Lasarteko jatetxeko bi chef-ekin batera, Maxime Fanton eta Yago Márquez. Berasategi urtean bitan hurbilduko da fisikoki, nahiz eta astero bilduko den Shanghaiko bere ekipoarekin bideo-konferentzia bidez.

Restaurant Martin
811 Hengshan Rd Shanghai 200031
(Xujiahui Park-en, Zhaojiabang Lu-tik hurbil)
telefonoak +86 21 6431 6639, +86 21 6431 9811
Webgunea: www.restaurantmartin.com.cn

Lotura interesgarriak

- www.martinberasategui.com