Saladillo, Argentina. 155 urte bete ditu Buenos Aires probintziako Saladillo hiriak eta beste zenbait ekintzaren artean janari salmenta herrikoi eta erralodi batekin ospatu zuen. Udalak deituta herriko hainbat erakundek hartu zuten euren gain menua prestatzeko ardura –bost mila pertsonentzako gisatua zen– plaza nagusian saltzeko.
Jende talde handientzako otorduak prestatzen eskarmentu handia daukaten Itxaropen Euskal Etxeko lagunak ere hor izan ziren, sukaldari taldeko parte, eta aldez aurreko lana –barazkiak zuritu eta txikitzea– euskal egoitzan egin ondoren plazan elkartu ziren gainerako erakundeetako ordezkariekin, gisatua prestatzen bukatu eta gero saltzeko. Itxaropena Euskal Etxeko erreferente den Silvina Bordenavek EuskalKultura.com-i azaldu dionez, herriko erakundeen aldeko ekimena zen eta egindako etekinen %75a elkarteentzat zen.
Prestatutako guztia saldu zuten eta Jose Luis Salomon alkatearekin batera, hemen legenda den Julio ‘Vasco’ Olarticoechea futbolari ohia ere --1986ko Munduko Kopa Argentinarentzat irabazi zuena-- hurbildu zen plazara gisatua dastatzera.
Argazki gehiago, hemen.
Lagun bati bidali
Komentarioa gehitu
