"Hi Kantari" kantutegiko abestien letrak eta doinuak sarean jarri dituzte Ipar Amerikako euskal etxeek

2012/03/09

NABO Kantari Eguna Kaliforniako Rocklin-en, 2008ko urriaren 11ean. Kantuz, Ambroise Clark-Curutchague; begira, Martin Etchamendy aurkezlea

PUBLIZITATEA

"Aberriaren mugak" kantutik hasi eta "Xarmangarria zira" abestiraino; ia 80 kantu igo ditu bere webgunera NABO Ipar Ameriketako euskal etxeen federazioak. Abestiak duela zenbait urte bildu zituen federazioak "Hi Kantari" izeneko bilduman, euskal-amerikar komunitateko kideen artean kantatzeko ohitura mantentzeko eta suspertzeko asmoz. Orain eguneratu egin dute kantutegia eta teknologia berriei esker eskuragarri jarri dute interneten: NABOren webgunean daude abestien letrak eta doinuak, mundu osoko kantazaleek balia ditzaten. Gainera, smartphone edo mugikorren bitartez ere kontsulta daiteke webgunea.

Donostia-San Sebastian. NABO federazioak Ipar Ameriketako euskal komunitateko kideen eskura jarri nahi izan du "Hi Kantari" kantutegia, eta sarera igo ditu 80 bat abestien letrak eta doinuak. Ideia, baina, mundu osoko euskaldunentzako interesgarria izan daitekeelakoan gaude; izan ere, kantutegi honetan 79 euskal tradizioko abesti eta kanta garaikide daude, bazkalostean, afaritan edo lagunartean kantatzeko apropos aproposak. Batzuk ezagunak eta kantatuak dira oso --"Nere herriko neskatxa maite", "Oi ama Eskual Herria", "Guk euskaraz", "Triste bizi naiz eta", "Lau teilatu"-- eta beste batzuk merezi du sartu eta ikasteak, kantatzeko euskal usadioa berritu eta gal ez dadin.

Orain sarean agertu den kantutegiko abestien bilduma eta aukeraketa egiteko ardura John Ysursak hartu zuen, koordinatzaile eta zuzendari gisa (liburusketan-eta bere izena agertzen ez bada ere) eta berarekin lankide ibili dira Jean Flesher, Darrin Schuck, Begoña Echeverria, Andrea Bidart Oteiza, Jenny Ysursa eta Joseba Etxarri. John Ysursa arduratu da baita ere materiala egokitu eta orain online jartzeaz. Bildumaren helburua, euskarri batean zein bestean, euskara kantuaren bidez sustatzea izan da eta euskaraz kantatzeko ohitura bera suspertzea.

"Liburuxka hau NABOk euskal kantua sustatzeko egiten duen ahalegin bat da, eta sarriago kantatzen entzungo zaitugula espero dugu", diote arduradunek webgunean. "Orduan gure eskerrik beroenak jasoko dituzu, gure kantuak eta gure hizkuntza bizirik mantentzeagatik! Urrunegi heldu gara orain amore emateko. Hi kantari: zu zara orain kantaria".

-"Hi Kantari" kantutegia online, hemen.