euskalkultura.eus

Boise, Idaho, Estatu Batuak. Estatu Batuetako bazterretatik Boiseko Jaialdi 2010en parte hartuko duten euskal musika eta dantza taldeekin batera, badira bi talde Euskal Herritik propio bidaiatu direnak, 'Made in Euskadi' etiketarekin anai-arreba euskalamerikarrekin bat egiteko, Euskadiko dantzarien oikurra eramanez 'Old Country' edo europar euskal Amalurraren ordezkari izateko. Gipuzkoak Lapurdirekin daukan mugakoak dira biak, eta bi probintziotako kideak dauzkate. Irungo 'Txorimaloak' eta Hendaiako 'Mutxiko' taldea dira.

Irundarren kasuan, trikiti eskola eta jole-taldea dira Txorimaloak. Haurrrak eta gaztetxoak dira bertako partaide, eta eskolan ikasitakoa agerrarazteko emanaldiak eskaintzen dituen trikiti taldea badaukate. Oso gazterik hasten dira umeak bertan, eta emaitza onak lortu dituzte ikastea eta ongi pasatzea uztartzen. Izan ere, hau ez dute Boisera etorriko diren lehenengo aldia, 2000eko Jaialdin parte hartu baitzuten. Hain izan zen handia lortu zuten arrakasta, bertako jende batzuk elkarte batean bildu eta, Txorimaloak-ekoen laguntzarekin, euren moduko eskola eta talde bat sortu zutela Boisen: arrakastaz ari den Txantxangorria taldea. Euren pareko europarrak bezala ari dira, eta Boisen eta inguruetan jendeak gustu handiz ikusi eta entzuten ditu, haur ikasleak euren irakasle eta gurasoekin, guztiak euskal festetan eta emanaldietan euskal aireak elkarrekin joz.

Hendaiako Mutxiko taldeari dagokionez, lehenengo aldia dute Estatu Batuetan. Duela bi urte Argentinako euskal etxeetan barrena zirkuitu bat egin ondoren pentsatu zuten aurten Ipar Ameriketara etortzea. Aurkeztu ziren Jaialdikoen aurrean, euren emanaldien bideoak bidaliz, eta Boisen zeuzkaten hainbat proposamenen artean eurena hautatu zuten. Ezohiko taldea dira, taldeko gehienak dantzari helduak baitira, baina ez horregatik indar eta abilezia gutxiago dutenak. Ikuskizun polita eta oso bizi eta animatua da eurena. Bost musikari eta hogeita bi dantzari abiatu ziren joan den astean Ameriketara. Boisera sartu aurretik, San Frantziskotik pasatuak dira eta, izan ere, emanaldia eskaini zuten joan den igandean South San Frantziskoko Basque Cultural Center-en. Hiri kaliforniarra bisitatu eta gero abiatuko dira Boisera, bertako Fairgrounds, Morrison Center, eta Basque Block-ean emanaldiak eskaintzeko.