euskalkultura.eus

Caracas, Venezuela. Biltzar Nagusi Ezohikoa egin zuen joan den larunbatean Venezuelako hiriburuko bere egoitzan Caracasko Eusko Etxeak, bildutakoen eguneko gai bakarra erakundeko Zuzendaritza Batzorde berria hautatzea, aurrekoak lanean lau urte bete ondoren.

Gai bakarreko bilera hau joan den urtarrilaren 30ean egindako Ohiko Biltzar Nagusiaren ondotik etorri da, aldi hartan, orain arteko Batzordearen iazko kudeaketa txostenak eta azalpenak oro onartu ondoren ez baitzuten bildutakoek inongo erabaki argirik hartu ahal izan Zuzendaritza Batzorde berria osatzeko orduan, nahiz eta horri buruzko elkarrizketak eta eztabaidak luze hartu zuen. Horregatik deliberatu zen, Biltzar Nagusi Ezohiko monografiko baterako deia egitea, joan den larunbaterako.

Oraingoan bai, Biltzarrak izan du ondoriorik eta Carlos Otañok hartu dio lehendakari lekukoa orain arteko Pedro Javier Arriaga Aguirreri. Lehendakari berria bezala, aho batez erabaki dira Batzordeko gainerako karguak: Victor Manuel Ballatori Arteaga, lehendakariorde; Maria Teresa Ballotori Arteaga, diruzain; Itziar Rodriguez, idazkari; eta Ekaitz Lacasa, batzordekide.