euskalkultura.eus

euskal diaspora eta kultura

Albisteak rss

'Gure Txokoa' Euskal Etxea Cordoba hiriko komunitatearekiko harremanak sendotze aldera lanean ari

2010/09/13

María del Carmen Errasquin-ek eta Alberto Silva-k aipamen bereziak jaso zituzten Daniel Giacomino Cordoba hiriko intendentearen eskutik (argazkia EE)
María del Carmen Errasquin-ek eta Alberto Silva-k aipamen bereziak jaso zituzten Daniel Giacomino Cordoba hiriko intendentearen eskutik (argazkia EE)

PUBLIZITATEA

Hamar urte betetzen dira aurten René Favaloro sendagile argentinar ospetsua hil zenetik eta omenaldi gisa Cordobako Udaletxeak “René Gerónimo Favaloro Sendagilea" Sariaren Lehenengo Edizioan parte hartzera gonbidatu zuen bertako komunitate zientifikoa. 'Gure Txokoa' Euskal Etxeak ere erantzun zion deialdi honi. Alde batetik, bi kidek beren bi ikerlan aurkeztu zituzten. Beste alde batetik, sari banaketaren ekitaldian Alberto Maiztegui irakaslearen presentzia bideratu zuen euskal etxeak. Cordoba hiriarekiko bere engaiamendua erakusteko, euskal etxea hitzaldi ziklo bat ere gauzatzen ari da. “Etortzen den jendearen interesak bultzatzen gaitu horrelako ekintzak egiten jarraitzera”, adierazi du euskal etxeko batzordeak.

Cordoba, Argentina. Joan den abuztuaren 5ean eta Cordobako Kabildoan, “René Gerónimo Favaloro Sendagilea" I. Edizioko sariak banatu ziren. 'Gure Txokoa' Euskal Etxeko kide kuttun eta 'hiritar txit argi' den Alberto Maiztegui irakasleak izan zuen ekitaldia irekitzeko eta sariak banatzeko ardura.

“René Gerónimo Favaloro Sendagilea" Saria Lehenengo Edizioa 2010 01

[Daniel Giacomino intendenteak Cordobako 'hiritar txit argi' den Alberto Maiztegui irakaslea agurtzen (argazkia EE)]

Aipamen bereziak jaso zituzten ikerkuntzen artean aipa daitezke “Drogak, beldurarren mozorroa” izenekoa,  María del Carmen Errasquin lizentziatuarena, eta “Osasunerako oinarrizko lanen eta gastu berreskuratzearen gaur egungo garrantzia”, Alberto Silva medikuarena. Errasquin eta Silva euskal etxeko kide dira, eta Cordobako adituek oso baliotsutzat hartu dituzte euren lanak. 

Gure Txokoa Euskal Etxeko hitzaldi zikloa 2010 01

[Euskal Etxeak antolatutako hitzaldietan jende ugari bildu zen (argazkia EE)]

Beste alde batetik, 'Gure Txokoa' Euskal Etxeak hitzaldi ziklo bat jarri du martxan duela aste batzuk. “Asmoa da gure ekarpena egitea gizartean. Hori dela eta kideei interesatzen zaizkien gaiei buruzko mintzaldiak antolatzen ari gara” adierazi dute euskal etxeko arduradunek. Argentinaren Bigarren Mendeurrenaren ospakizunen testuinguruan, Edmundo Herediak "Cordoba hiria Bigarren Mendeurrenean" delako hitzaldia eman zuen. Carlos Pacha lizentziatua, bere aldetik, “Oriberen euskaldunei” buruz mintzatu zen. Bietan, publiko ugari bildu zen euskal etxera.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia