euskalkultura.eus

Gral. Roca, Argentina. Duela bost urte hasi ziren Gral. Rocako Gure Etxea euskal etxeko kideak neguko solstizioa -- udakoa Euskal Herrian eta Ipar Hemisferioan -- ospatzen. “Hasieran, gure arteko jaia zen, batez ere txikientzat zuzendutako ekintza zen”, azaldu dio Gure Etxea euskal etxeko lehendakaria den Emma Trapagak EuskalKultura.com-i. “Gero, Elkarte Espainiarreko eta Galiziar Zentroko kideek gehitu zitzaizkigun eta azken hiru urte hauetan elkarrekin ekin diogu jaiaren antolakuntzari”, adierazi du Trapagak.

[Euskal dantzek erakarri zuten publikoa suaren berotasunera (argazkia EE)]

Aurreko edizioetan bezala, herriko Kanal Handiko anfiteatroan piztu zen San Juan sua. Nahiz eta 8 gradu zero azpitik izan eta Txileko Puyehue sumendi-errautsen kaltea jaso, 150 lagun inguru bertaratu ziren anfiteatrora. Hor euskal etxeko dantzari guztiak – txiki, gazte eta helduak – pasatu ziren agertokitik euren dantzak erakusteko. Eta dantzaren arloan ere, opari berezi bat zuten euskal etxeko ordezkariek publikoarentzat: Gau luzeenean, Patagoniako Ballet Fundazioko dantzariek, jaian parte hartzeaz gain, euskal dantzak interpretatu zituzten beren errepertorioan.

[Jaia bukatu ondoren, euskal etxean bildu ziren antolatzaileak (argazkia EE)]

Udal interesekoa izendatua izan zen ekintza honek, herriko agintari eta hedabideak ere erakarri zituen. Eta gonbidatu guztiei eskaini zizkieten sagar torta eta txokolate beroa euskal etxeko kideek.

[Euskal etxeko txikienak (argazkia EE)]

Sua apaltzen joan zenenean, publikoa anfiteatrotik urruntzen hasi zen. Gure Etxea-ko lagunak, berriz, haien egoitzara bildu ziren jaiaren arrakastaz disfrutatzeko. Eta arrakasta bera espero dute Gral. Rocako euskaldunek uztailaren 2rako. Izan ere, datorren larunbatean gorriz eta zuriz jantziko dira Patagoniako euskaldunak sanferminak ospatzeko.