euskalkultura.eus

Viña del Mar, Txile. Zalantzarik ez da pozik dabilela aspaldian, eta gaur poz hori agerian izango du seguruenik, Viña-Valparaisoko Eusko Etxea-ko lehendakari den Archibaldo Uriarte. Aita Bakiokoa izan zuen euskal-txiletar honek lanak hartu ditu azken hamabost urteotan bere jaioterriko euskal etxea birsortzen eta pixkanaka pixkanaka edukiz eta ilusioz betetzen.

Egiari zor, gauzak ezin-hobeto ateratzen ari zaizkio, hein batean, azken bolada honetan, besteak beste 68 urte dituen bere lehendakaritzapeko euskal etxeak gerora begira urrats sendoak eman baititu, hala nola euskal elkarterako egoitza berria lortuz eta, gaur partikularzki, Eusko Etxearen buletin berria hasiz.

Buletinaren aurreneko zenbaki honek, izan ere, Eusko Etxearen azken urteotako historia eta orain artean eman diren pausoen berri ematen du. Kolorez datozen lau orrialde biltzen ditu eta edukiaren artean elkarteko eta euskal komunitateko bazkide eta lagunen lekukotasunak eta iritziak dakartza, Julian Celayaren gutun bat, Archibaldo Uriartek sinatzen duen editorial bat, eta abar. Elkarteko gazte bati egindako elkarrizketa zati bat ere baitaratzen du, adieraziz elkarrizketa osorik Eusko Etxearen webgunean irakur daitekeela, www.euskoetxea.cl helbidean hain zuzen.

[Zorionak EuskalKultura.com-en izenean Eusko Etxeari, Archibaldo Uriarterekin eta Rubila Araya kazetariari egitasmo hau indarrean ipintzeagatik. Urte askoan, segi bizkor!]