euskalkultura.eus

Donostia-San Sebastian. Atzo gauean hasi zen ofizialki Kursaal eraikinean Donostiako Nazioarteko Zinemaldiaren 56. edizioa, hasi ere ohiko inaugurazio galarekin, Edurne Ormazabal kazetariak eta Belen Rueda aktoreak aurkeztua, ondoren Richard Eyre-ren "The other man" filma eman zelarik, lehiaketatik kanpo. Ordubete iraun zuen Kursaaleko lehenengo ekitaldi horretan txaloaldi bereziki beroa eskaini zitzaion 93 urteko Mario Monicelli-ri, bere 'I soliti ignoti'rekin Urrezko Maskorra eraman zuela 50 urte bete direnean, karia hortara Zinemaldiak antolatu dituen hiru atzerabegirakoetatik bat bere filmografiari eskainirik.

Aurtengo egitaraua osatuko duten sail guztien aurkezpena egin zen, baita sariena ere, tartean Fipresci saria, kritikariek Paul Thomas Anderson-i egotzia, 'There will be blood' lanagatik. Donostia sariak, berriz, Meryl Streep eta Antonio Banderasen eskuetara joango dira. Jonathan Demme izango da sail ofizialeko filmak epaituko duen mahaiko buru, berarekin batera mahaikide Martina Gusman aktore argentinarra, Masato Harada zuzendari, aktore eta idazle japoniarra, Leonor Watling aktore eta kantari espainiarra, Michael Ballhaus argazki zuzendari alemaniarra eta Nadine Labaki zuzendari libanoarra. Zabaltegi saileko filmen artean --beste zinemalditan erakutsitako perlak biltzen ditu-- Woody Allen-en 'Vicky Cristina Barcelona' dago, Allen bera, eta Javier Bardem eta Rebeca Hall aktoreak ordezkari dituela Donostian. 'Horizontes Latinos' sailak, berriz, hamalau izenburu aurkeztuko ditu.

Euskal Zinemaren tartea: lau estreinaldi

Euskal zinemagintzari dagokionez, irailaren 24a izango da Euskal Zinemaren Eguna. Lau film estreinatuko dituzte, lehen biak dokumentalak: Lourdes Bañuelosen "Vivir con las botas puestas" ,eta Juan Migel Gutierrezen "Motema na ngai"; beste biak fikziozkoak, Gorka Merchanen "La casa de mi padre", eta Pavel Girouden "Omerta" ekoizpen euskal-kubatarra. Egun berean, azken urteotako beste zazpi euskal film luze ere emango dituzte, Informatiboa izeneko atalean. Film laburren emanaldia ere Kimuak-eko iazko eta aurtengo zortzina izenburu emanez. Egun horretan Maria Cristina egingo den ekitaldian, Marivi Bilbao aktoreak jasoko du 'Amalur' saria, eta Fernando Larruquert eta Nestor Basterretxea zuzendariek 'Ibaia' saria, azken hau 'Amalur' (1968) filmearengatik.

-56. edizio honetako egitaraua
-Zinemaldiko argazki historikoak
-Egunero egingo diren aurkezpenen bideoak
-Sail ofiziala
-Euskal Zinemaren Eguna