Gastronomia menuak eta kartak euskaratzeko itzultzaile automatikoa interneten eskuragarri

2008/07/07

Aurkezpenean proiektuko arduradunek tresnaren ezaugarriak eta helburuak azaldu zituzten (argazkia Erabili.com)

PUBLIZITATEA

Donostiako Euskararen Udal Patronatuak taberna, jatetxe zein edozein etxetako menuak eta kartak gaztelaniatik euskaratzeko tresna informatikoa sortu du. Gaur egun interneten dagoen era honetako lehen itzultzailea da hau eta nahiz eta ostalari eta merkatari euskaldunentzat sortua izan, edozeinek erabil dezakeela azaltzen dute sortzaileek. Guztira sistemak 1.057 termino biltzen ditu. Diasporako euskaldunek ere euren afari, bazkari, picnic eta euskal tabernetako menuak euskaratzeko erabiliko dute tresna hau, zalantzarik gabe.

Donostia, Gipuzkoa. Donostiako Udal Patronatuak abian jarri duen menuak eta kartak euskaratzeko itzultzaile automatikoa Merkatari.net webgunean dago. Programak iturri desberdinak erabiltzen ditu bere informazio corpusa osatzeko: Merkatari.net atariko Euskara Platerean saileko hiztegia eta menuen bilduma, eta Leioako Ostalaritza Eskolako Gastronomiavasca.net eta Sukaldean.com webguneetako fondoak, nagusiki. Guztira 1.057 termino eta horien eratorriak biltzen ditu. Sarrera horiek esaldia osatzeko osagaiak sail desberdinetan banatu dira:

- Osagai nagusiak: txuleta, karramarroa...
- Hitz anitzeko terminoak: baratxuri berdea, zizka-mizkak aukeran...
- Adjektiboak: ketua, krematsua, etxekoa...
- Aditzak: gozatua, irin-arrautzeztatua...
- Jakien zatiak: saiheskia, hanka, muina...
- Prestaera moduak: entsalada, ogitartekoa...
- Gehigarriak: olioa, bainilla, maionesa...

Ekimena Donostian aurkeztu zuten Iñaki Illarramendi Gipuzkoako Ostalaritza Enpresarien Elkarteko lehendakariordeak eta Ainhoa Beola Hizkuntza Normalkuntzako zinegotziak. Lehenengoak aipatu zuenez, tresna azkar honek ostalarientzat eguneroko lana egiteko oso lagungarria izango da. Beolak, bestalde, gastronomiari loturiko zenbait hitzen erabilera normalizatzeko lagungarria izango dela azpimarratu zuen.

Lotura interesgarriak

Merkatari.net
www.merkatari.net

Gastronomia Vasca
www.gastronomiavasca.net

Sukaldean
http://sukaldean.com