euskalkultura.eus

La Plata, Argentina. Futbolarekiko pasioak muga guztiak gainditzen ditu. Argentinan dauden Euskal Herriko futbol taldeetako zaleak eta haiek sortutako kirol-laguntaldeak izan daitezke, agian, fenomeno horren froga adierazgarrienak.

Urtebete pasatu da jadanik La Platako 'Bilbao Athletic Tango Club' sortu zenetik eta bere kideek gonbidatu bereziekin ospatu dute. Euskal etxeko biziarteko bazkidea den Juan José Umarán Izak Athletic Club-i buruzko hitzaldia eman zion bildutako jendeari. Bere hitzaldian Argentinan bizi den ingeniari euskaldunak Bilbo eta Euskal Herria ere deskribatu zituen.

Futbola argentinarren pasio bat da, dudarik gabe. Baina Rio de la Platako biztanleek, badute beste pasio bat eta horrek ere badu lekua 'Bilbao Athletic Tango Club' laguntaldean: tangoak. Roberto Alicastro kideak tango kontzertua eman zuen afariaren testu-inguruan eta abesti bakoitzeko azalpenak eskaini zizkion publikoari. Lehiaketa batzuk irabazitakoa den tango-zale honek, abesteaz gain, pieza bat dantzatu zuen emaztearekin.

“Oso garrantzitsua izan da guretzat Juan José Umarán Iza eta Roberto Alicastroren partaidetza. Eta oso pozik gaude ospakizunarekin. Taldekook erabaki dugu urtero, apirilaren 1ean, urtemuga ospatzea”, adierazi du Felipe Ochotorena 'Bilbao Athletic Tango Club' Laguntaldeko lehendakariak. “Beste alde batetik, azpimarratu nahi dugu kirola egiteko materiala eman diogula La Platako 'Athletic Club de Bilbao' Futbol Eskolari, eta oso harro gaude, hori gure helburuetako bat baitzen. Bilbotik oso urrun gaude baina gure interesa eta engaiamendua oso handiak dira eta aurrera jarraitzera bultzatzen gaituzte”, azaldu du Ochotorenak.