euskalkultura.eus

Vitoria-Gasteiz. Jaurlaritzaren Gobernu Kontseiluak argi berdea eman zion atzo euskal etxeak dauden herrialde eta tokietara bira kulturalak egiteko 2011eko diru-laguntza deialdiari. Bertan eskatzaileak artista edo bira-egileek berek behar dute izan eta ematen diren diru-kopuruak garraio gastuak hartzen dituzte haintzakotzat, Euskaditik bira egin behar den herrialde(eta)ra joan-etorriak eragindako gastuak hain zuzen ere.

Horretarako aurreikusi diren laguntza horien guztizkoa 90.000 eurokoa izango da eta dirulaguntza horietara biltzeko aukera izango dute Euskal Autonomia Erkidegoan egindako ekoizpen kulturalek, euskal etxeak dauden tokietan erakutsi nahi badute obra eta euskal etxeen gonbidapena jaso badute. Proiektuetan kontutan hartuko diren ezaugarrien artean aipa daiteke proposatutako ekimenaren originaltasuna eta ekarpen kulturala, eta helduko den euskal etxeen eta jendearen kopurua.

Dirulaguntza horiek eskuratzeko eskabideak aurkezteko epea apirilaren 15ean amaituko da. Dirulaguntzon bitartez, joan-etorriko txartela, osorik edo zati bat, ordainduko da. Dirulaguntzon deialdia, xehetasun eta jakingarri guztiekin, aste honetan emango du argitara Euskal Herriko Aldizkari Ofizialak.