euskalkultura.eus

euskal diaspora eta kultura

Albisteak rss

Eusko Jaurlaritzak eta Nafarroako Gobernuak euskara sustatzeko elkarlan hitzarmena sinatu dute

2009/01/26

Xabier Azanza, Euskarabideko zuzendaria; Nafarroako Hezkuntza sailburu Carlos Pérez Nievas; Eusko Jaurlaritzako Kultura sailburu Miren Azkarate; eta Patxi Baztarrika, Jaurlaritzako Hizkuntza Politikarako sailburuordea
Xabier Azanza, Euskarabideko zuzendaria; Nafarroako Hezkuntza sailburu Carlos Pérez Nievas; Eusko Jaurlaritzako Kultura sailburu Miren Azkarate; eta Patxi Baztarrika, Jaurlaritzako Hizkuntza Politikarako sailburuordea

PUBLIZITATEA

Euskararen arloan bide berriak irekitzen ditu gaur Eusko Jaurlaritzako eta Nafarroako Gobernuko Hizkuntza Politika arloetako arduradunek sinatu duten lankidetza hitzarmenak. Hitzarmena euskararen sustapenerako Asmoen Aitorpen bat da eta hizkuntza bi lurraldeen ondare bezala gorde eta biziberritzea du helburu. Hitzarmenak aintzat hartzen ditu eskualdeetako edo eremu urriko hizkuntzen Europako Gutunaren 2005eko jarraipen txostenean egindako gomendioak.

Iruñea, Nafarroa. Adierazpena Iruñeko Nafarroako Jauregian izenpetu dute gaur goizean Miren Azkaratek, Eusko Jaurlaritzako Kultura sailburuak, eta Carlos Pérez Nievas Nafarroako Gobernuako Hezkuntza kontseilariak. Eurekin batera Patxi Baztarrika, Eusko Jaurlaritzako Hizkuntza Politikarako sailburuordea eta Xabier Azanza Euskarabidea, Euskararen Nafar Institutuko zuzendaria izan dira.

Asmoen Aitorpen honen ondorioz ezarriko den lehentasunezko helburuetako bat izanen da hizkuntza politikaren alorrean lankidetza teknikorako loturak ezartzea, informazioa eta jakintza elkarrekin trukatzeko, eta helduen euskalduntzearen eta alfabetatzearen esparruan jarduerak koordinatzeko. 

Aro berri bat

Adostasun honek aro berri bat zabaltzen du, euskarari dagokionez, Hegoaldeko bi administrazioen artean. Horretarako lehen urratsa, Gobernu bien arteko hizkuntza politikaren alorrean, Eusko Jaurlaritzaren egoitzan 2008ko otsailaren 22an izandako lan bilera eta agerraldiarekin eman zen. Bilera hartan Miren Azkarate Kultura sailburuak adierazi zuen  “gaurtik aurrerakoaren lehen urratsa da, aurrera begirakoa. Ez da ohikoa baina honek datorrenaren atea zabaltzen du". Ia urte bete honetan Hizkuntza Politikarako sailburuordetzaren eta Euskarabidea Nafar Institutuaren arteko lan bilera sorta eta elkarlana etengabea izan da eta horren ondorioa da orain izenpetu den adostasuna.

Gaur goizeko ekitaldian Miren Azkaratek  eskerrak eman dizkie Nafarroako kontseilari Carlos Perez Nievas-i eta Euskararen Nafar Institutuko Zuzendari Xabier Azanzari, hilabete hauetan bi gobernuen arteko Hizkuntza Politika alorrean harremanak normalizatzeko emandako pausoengatik.

Guztion ondare

Miren Azkarate sailburuak aipatu nahi izan du euskararen geografia zabala dela, “euskarak mendetan bizirik iraun du eta mende guztietan gizakiok, legitimitate osoarekin, geure buruari zirkunstantzia historikoen arabera, egitura juridiko administratibo desberdinak eman dizkiegu. Baina egitura horiek izan arren, euskarak iraun du guztion ondare delako. Euskararen geografiak gaur bi erkidego autonomo eta bi estatu hartzen ditu. Eta horretan euskarak elkartzen gaituen Pirinio mendien antza du”.

 

 



Komentarioak

  • puta

    hijos de prostituta

    patata, 2009/11/06 15:58

« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia