euskalkultura.com

euskal diaspora eta kultura

Albisteak rss

Euskararen Eguneko oihartzuna munduan zehar entzungo da Diasporako euskal etxeei esker

2008/12/02

Rosarioko (Uruguai) Euskal Etxeko haurrak Euskararen Eguna Montevideoko Haize Hegoa Euskal Etxean ospatzen
Rosarioko (Uruguai) Euskal Etxeko haurrak Euskararen Eguna Montevideoko Haize Hegoa Euskal Etxean ospatzen
Gainean dugu Euskararen Nazioarteko Eguna --asteazkenean izango da-- eta munduko bazter desberdinetako euskal etxeek prest dituzte jada data hau ospatzeko antolatu dituzten ekimenak. 1948an sortu zuen Eusko Ikaskuntzak Euskararen Eguna, bereziki mundu osoko euskal komunitateari zuzendua. Diasporak erronka jaso eta urtetik urtera gero eta ekimen gehiagorekin ari da ospatzen. Aurten ere jai eta hitzordu desberdinen berri heltzen ari da gure erredakziora: Madrid, Australiako Sydney, Argentinako Mar del Plata eta Buenos Aires... hauetxek dira batzuk. Datozen egunetan gehiago.

Donostia-San Sebastián. Etzi, abenduaren 3an, ospatuko da ofizialki Euskararen Nazioarteko Eguna, eta Diasporan euskal etxea askok bat egingo dute ekimenarekin, euskararen aldeko aldarrikapen hau munduko herrialde desberdinetaraino hedatuz. Kultura eta gizarte ekimen ugari antolatu dituzte euskal etxeek, eta askok euskara ikasten ari direnei omenaldi berezia egingo diete, beraiek baitira munduan zehar euskara bizirik mantentzen ari direnak.

Madrileko Euskal Etxean adibidez, ekimenak euskaltegiko ikasleentzat antolatu dituzte bereziki, 'baina parte hartu nahi duen edonor gonbidatuta dago' ere, elkarteko arduradunak agertu dutenez. Jaia asteazkenean bertan hasiko da, euskarazko laburmetraien emanaldi batekin (19:00tan hasita). Ondoren euskal dantza eta txalaparta lantegiak eskainiko dituzte. Hurrengo egunean beste laburmetrai sorta bat izango da ikusgai eta jaia borobiltzeko Sukalde txokoan afaria egingo dute euskaltegiko ikasleek.

Zinea, kasu honetan ere euskal laburmetraiak, izango da Mar del Platan, Argentinan egingo diren ospakizunen ardatza. Artaburu Euskaltzale Elkarteak antolatuta euskal laburmetrai emanaldia egingo da etzi eta ostegunean. Etzi Kimuak programako laburmetraiak Diagonal antzokian eskainiko dituzte, 19:30tan hasita. Ostegunean, sorta berri bat izango da ikusgai Euskal Etxean, Moreno 3440 helbidean.

Andrés de Irujori omenaldia Buenos Aires-en

Argentinan ere, baina kasu honetan Buenos Aires-en, Euskaltzaleak elkarteak Euskararen Aste bat ospatuko du, asteazkenean hasita. Eguna Andres de Irujori omenaldia izango da eta jokoak, mintzaldiak, dantza erakustaldiak eta besta antolatu dituzte. Mintzaldiarekin hasiko da eguna, 19:30tan, eta María Elena Etcheverry de Irujo, Andres de Irujoren alarguna, izango da hizlari. Ondoren euskara taldeak euskaraz eta gazteleraz egingo den jokoa prestatu du, galderen bitartez partehartzaileek jai honi buruzko datu berriak ikasteko aukera izan dezaten.

Azkenik, eta Andrés de Irujo euskaltzalearen omenez, Euskaltzaleakeko dantza taldeak Ekin izena hartuko du ofizialki, Irujok Buenos Airesen sortu zuen argitaletxe ezaguna gogoratuz. Eta eguna giro ezinhobean bukatzeko, Mexiko 1880ko egoitzara urbiltzen direnek 'taberna vasca' edo euskal erromeria batean parte hartzeko aukera izango dute.

Euskaltzaleakekoek larunbateraino atzeratuko dute jai nagusia, elkarteko kide ahal bezain beste bildu nahian. Elkartearen jai klasikoa bihurtu da hau eta urtero kide eta lagun asko biltzen dira bertara. Egitaraua 20.30tan jarriko da abian eta besteak beste abesbatzak, antzerki taldea, dantza taldea, ikasleak, lagunak eta senitartekoek parte hartuko dute.

Ondoren, Euskararen Jaiak Argentinatik munduko beste aldera egingo du salto, Australiara, izan ere Sydney hiriko euskaldunek igandean, abenduaren 7an, ospatuko dute, euskal etxearen egoitzan egingo den ekitaldiarekin.

Euskararen Eguna dela eta heldu zaizkigun hitzorduetako gutxi batzuk baino ez dira. Datozen egunetan, heldu ahala, besteen berri ere emango dugu.

 



Komentarioak

  • aurkezpena

    Kaixo, interesgarria ematen dit bloga, horrexegatik esteka jarri dut nirean. Nik kultura, olerki,filosofia eta psikologiari buruzko artikuloak idazten ditut; gonbidatuta zaudete irakurtzera Agurrak Unai www.blogari.net/unaimakua

    unai makua, 2008/12/02 15:43

« aurrekoa
hurrengoa »

© 2014 BasqueHeritage S.L.

Portuetxe 51, 201. bulegoa
20018 Donostia / San Sebastian
Tel: (+34) 943 504477 / (+34) 943 316170

jaurlaritza gipuzkoa bizkaia