euskalkultura.eus

euskal diaspora eta kultura

Albisteak rss

Euskarak jakinmina piztu zuen Parisen Expolangues azokan eta Sorbonne unibertsitatean egin ziren ekitaldietan

2013/02/12

Expolangues azokako euskal standean: Garikoitz Mendizabal, Mari Jose Olaziregi, Miren Dobaran, Miren Ibarluzea, Aizpea Goenaga, Miren Azkarate, Josune Ariztondo, Pello Salaburu, Itziar Nogueras eta Argitxu Camus (argazkia Etxepare)
Expolangues azokako euskal standean: Garikoitz Mendizabal, Mari Jose Olaziregi, Miren Dobaran, Miren Ibarluzea, Aizpea Goenaga, Miren Azkarate, Josune Ariztondo, Pello Salaburu, Itziar Nogueras eta Argitxu Camus (argazkia Etxepare)

PUBLIZITATEA

Parisetik bueltan dira iragan astean Expolangues hizkuntz-azokan parte hartu zuen euskal ordezkaritzako kideak. Bertan izan ziren, besteak beste, Etxepare Euskal Institutua, Bizkaiko Foru Aldundia, Azkue Fundazioa eta Langune hizkuntza enpresen taldea. Azokako euskal standean euskarari buruzko informazioa zabaldu zuten, eta horrez gain, Mariasun Landa idazleak eta Argitxu Camus historialariak hitzaldiak eman zituzten azokan eta Sorbonne unibertsitatean.

Donostia-San Sebastian. Euskal ordezkaritza zabala izan zen partaide Pariseko Expolangues azokan, iragan otsailaren 6tik 9ra, Etxepare Euskal Institutuak azpimarratu duenez. Bertan izan ziren, besteak beste,  Aizpea Goenaga Etxepare Euskal Institutuko zuzendaria eta Mari Jose Olaziregi erakunde bereko Euskararen Sustapenerako eta Hedapenerako zuzendaria, Josune Ariztondo eta Miren Dobaran (Bizkaiko Foru Aldundia eta Azkue Fundazioa), Fernando Alana (LANGUNE), Miren Azkarate eta Pello Salaburu (EHUko Euskara Institutua), Joseba Ossa (Bakun), Itziar Nogueras (Elhuyar Fundazioa) eta Elena Garcia (Eleka / Elhuyar Fundazioa).

Azokan euskal stand bat jarri zuen Etxeparek eta bertatik euskarari buruzko informazioa zabaldu zuten partehartzaileek. Horrez gain, euskara ardatz, hainbat ekitaldi arrakastatsu burutu ziren azokan eta Pariseko zenbait gunetan.

Hasteko, otsailaren 7an, Mariasun Landa idazleak eta Garikoitz Mendizabal musikariak “Bizitza zatiak: euskal literatura eta musika” emanaldia eskaini zuten Sorbonne Nouvelle III Unibertsitatean, Miren Ibarluzea irakurlea laguntzaile. Ekitaldira unibertsitateko ikasleak hurbildu ziren gehienbat. Bi egun geroago, otsailaren 9an, ikuskizun bera azokan ikusteko aukera izan zen.

Biharamunean, otsailaren 8an, Parisen Etxepare Euskal Institutuko euskara eta euskal kultura irakurle izandako Argitxu Camusek “Euskara: Europako hizkuntzarik zaharrena?” hitzaldia eskaini zuen azokan. Amaitzeko, arratsaldean Mariasun Landak “Festa aldameneko gelan. Euskal ikasle baten autobiografia Parisen, 1968-1969” mintzaldia eskaini zuen Pariseko Cervantes Institutuan.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia