euskalkultura.eus

euskal diaspora eta kultura

Albisteak rss

Euskaltzaleek hitzordu berria dute igande honetan Bastidan Araba Euskaraz jaialdiaren 28. edizioan

2008/06/13

Araba Euzkaraz jaialdiaren 28. edizioko logoa
Araba Euzkaraz jaialdiaren 28. edizioko logoa

PUBLIZITATEA

Aurtengo Araba Euskaraz jaialdia Bastidan ospatuko dute Euskal Herriko zazpi herrialdeetako -- eta Diasporako-- euskaltzaleek. 'Ametsak dirau' lemak urteetan zehar 'euskara berreskuratzea eta zabaltzea helburu izan duen ekimen honek edukitako zailtasunak' adierazten ditu, antolatzaileen esanetan. Bide horretan sendo jarraitu eta sustraiak mantenduz, 1.500 biztanle dituen herriak pertsona kopurua handitu egingo du asteburuan Euskal Herriko txoko guztietatik iritsitako euskaltzaleekin. Bertaratzen direnek hamaika ekimenez gozatzeko aukera izango dute: kontzertuak, haurrentzako jokoak, salmenta postuak, globo aerostatikoak , pailazoak eta bertsolariak, besteak beste.

Bastida, Araba. Igandean ospatuko den Araba Euskaraz jaialdiaren edizio berriak jarduera ugari eskainiko dizkie Euskal Herritik iritsitako euskaltzale heldu eta gazteei. Hiru guneetan banatutako ibilbide batek prestatutako proposamen guztietara eramango ditu bisitariak. Lehenengo gunean, musika gunea alegia, 'Sarkor', 'Gobernors', 'Txapelpunk' eta 'Etsaiak' taldeak arituko dira. Bigarren eremuan partaideek herri kirolak eta gastronomiari eskainitako tarteaz gozatu ahal izango dute. Bertan, Eusko Label pintxoekin batera (txahala, oilaskoa, piperrak), arabar Errioxako ardo dastapena egingo da eta txalapartariek giroa animatuko dute. Azkenik, hirugarren gunean egun osoan zehar gazteenek, besteak beste, jokoak, globo aerostatikoak, pailazoak eta artisau jarduerekin jolastu ahal izango dute.

Aurtengo Araba Euskaraz jaialdia 2006. urtean eraikitako Bastida Ikastolak antolatu du. Gaur egun 2tik 14 urte bitarterainoko (Derrigorrezko Bigarren Hezkuntzako bigarren maila arte) 200 ikasle inguru biltzen ditu. Irakasleen artean, Haur Hezkuntzako bost irakaslek, Lehen Hezkuntzako zazpik, Derrigorrezko Bigarren Hezkuntzako lauk, eta orientatzaileak, logopedak eta hezkuntza bereziko irakasleak osatzen dute zentroa.

Bastida izena 'bastio' (harresia, gotorlekua) hitzetik dator, herria Erdi Aroko herria harresi batez inguratuta zegoen eta. Ingurune garaia da eta berezko klima du herri arabarrak. Toloño mendiak Kantauri itsasotik datozen haize hezeak eusten ditu, horregatik mahastizaintzak eta ardogintzak berebiziko garrantzia dute herriko ekonomian.


Lotura interesgarriak

Araba Euskaraz
www.arabaeuskaraz.net



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia