Euskaltzaleak-ek eratutako kontzertu batekin hasi zuen Ruper Ordorikak Argentina eta Uruguaiko itzulia

2009/04/27

Ruper Ordorika eta Dani Perez gitarrajolea 'Plaza Defensa' Kultura Etxean, Buenos Airesen, joan den ostegunean, hiriburu argentinarreko Euskaltzaleak elkarteak antolatutako ekitaldian (argazkia EuskalKultura.com)

PUBLIZITATEA

Buenos Airesko Euskaltzaleak erakundeak antolatutako kontzertu batekin eman zion hasiera joan den ostegunean kantari oñatiarrak Argentinan eta Uruguain egingo duen itzulia. Emanaldian Jose Angel Irigarai olerkariak ere hartu zuen parte ‘Siete poetas vascos’ liburutik poema batzuk irakurriz. Ehun eta berrogei bat lagun bildu ziren ‘Plaza Defensa’ Kultura Aretoan Euskal Herriko musikaz eta literaturaz gozatzeko. Kontzertuaren ondoren, artistak eta ikusleak Euskaltzaleak-en egoitzara abiatu ziren elkarrekin afaltzera. Ekitaldiko argazkiak eta bideo bat ekarri ditugu hona.

Buenos Aires, Argentina. Buenos Airesko Liburu Azokan euren lanak aurkeztera FEVAk gonbidatuta etorri ziren Argentinara Ruper Ordorika kantaria eta Jose Angel Irigarai idazle eta olerkaria Euskal Herriko beste artista batzuekin batera. Diasporako publikoarekin biltzeko lehenengo aukera joan den ostegunekoa izan zen, apirilaren 23an, ‘Plaza Defensa’ Kulturgunean egindako kontzertuan.

Lehenengo kontzertu honetan, Ordorikak berak musikatutako beste egile batzuen olerkiak eta berak idatzitako abestiak ere kantatu zituen, Dani Perez gitarra-jolea laguntzaile. Bide batez, Irigaraik primizia bat oparitu zien Buenos Airesko San Telmo auzoan bildu ziren lagun guztiei: inprimategitik atera berria den eta momentu horretan oraindik aurkeztu gabeko ‘Siete poetas vascos’ liburutik poema batzuk irakurri zituen.

Ruper Ordorika Buenos Airesen 01

[Kontzertuan, erdian, aurkezten, Ruper Ordorika; ezkerrean, Jose Angel Irigarai; eskuinean, Dani Perez gitarrajolea (argazkia EuskalKultura.com)]

Kontzertua amaitu ondoren, artistak, haiekin etorritako ordezkariak eta publikoa, Euskaltzaleak-en egoitzara joan ziren afaltzera. Bertan erakunde horretako euskara ikasleek eta etxeko lagunek aukera izan zuten Euskal Heritik etorritako musikari eta olerkariarekin hitz egin, elkar ezagutu eta afari eder bat partekatzeko.

EMANALDIKO BIDEOA

Emanaldiko bideoa. Ruper Ordorikak "Zaindu maite duzun hori" kantatzen du Buenos Airesen, itzuliko lehenengo kontzertuan. Kantua eta egiten dion aurkezpen eta iruzkinak.