euskalkultura.eus

Madril, Espainia. Euskalerriaren Adiskideen Elkartearen (RSBAP, Real Sociedad Bascongada de Amigos del País-en) Gorteko Ordezkaritzak lehendabizikoz  bildu zituen genetistak, arkeologoak eta hizkuntzalariak  'Euskal historiaurrea: oraina eta etorkizuna' jardunaldian euskararen eta euskaldunen jatorriei buruz mintzateko.  Mintegiak  Euskal Herriko eta atzerriko akademiko eta adituak bildu zituen, eta Madrilgo RSBAPeko lehendakari  Iñigo de Yrizar izan zen jardunaldiko buru, elkarteko kide Rosa Ramírez-ek EuskalKultura.com-i azaldu dionez.

Bederatzi orduko jardunaldi maratoniano hiru zatitan banatu zen.  Hizkuntzalaritzari buruzko saioan  Joaquin Gorrochategui (UPV/EHU) eta Francisco Villar (Universidad de Salamanca ) akademikoek egin zituzten hitzaldiak.

[Joaquin Gorrochategiren mintzaldiko une bat (argazkia RSBAP)]



[Francisco Villar hizkuntzalariaren solasaldia (argazkia RSBAP)]

 
Antropogenetika saioan UPV/EHU-ko katedratiko Concepción de la Rúa eta Universidad Complutenseko Eduardo Arroyo izan ziren hizlari.

[Concepción de la Rúa mintzaldia ematen  (argazkia RSBAP)]

Azkenik, Arkeologia saioan Jesus Altuna, Gipuzkoako Arkeologia eta Paleontogia Ondare Zentruko zuzendaria, eta Universidad Complutenseko Historiaurreko katedratiko Martín Almagro Gorbea izan ziren hizlari.

Diziplina arteko lana

Hizlari guztiek konklusio irekiak eman zituzten, euskararen jatorriaren misterioa gai zaila dela onartuz, euskarak ez duelako urrutiko “seniderik” eta euskalkiak gertuegikoak direlako. Adituen esanetan diziplina bakoitzak besteen laguntza behar du ikerketa bide onean jarri ahal izateko.