euskalkultura.eus

euskal diaspora eta kultura

Albisteak rss

"Euskaldun hauek bizitza konplikatzera datozkigu": arazoak izan zituen Argentinako presidenteak euskal izen bat esateko

2016/12/20

Macri presidentea hizlari Urdinarrainen egin zuen inaugurazio ekitaldian
Macri presidentea hizlari Urdinarrainen egin zuen inaugurazio ekitaldian

PUBLIZITATEA

Gaurko bitxikeria Argentinatik dator, hango presidentea, Mauricio Macri, estu ibili omen zen-eta euskal jatorria duen herri argentinar baten izena esateko: Urdinarrain. Ozta-ozta, baina moldatu zen, eta gero broma egin nahi izan zuen: "Euskaldun hauek bizitza konplikatzera datozkigu". Bideoa bolo bolo dabil dagoeneko sare sozialetan.  

Donostia San Sebastián. Diario Registrado egunkariak sareratu du, besteak beste, Argentinako presidente Mauricio Macrik euskal izen bat esateko pasa omen zuen estuasunaren bideoa. Macri Entre Rios probintziako Urdinarrain herrian zegoen, bertan egin diren obra batzuk inaguratzen, eta kostatu egin omen zitzaion euskal jatorridun izena ahoskatzeko: Urdinarrain.

Baina izena esan eta gero, txistea egin nahi izan zuen: "Ikastaro bat egin behar da izen hau esateko. Euskaldun hauek guri bizitza konplikatzera etorri dira".

Bideoak erantzun ugari sortu ditu: batzuk ados daude, euskal izen asko ahoskatzeko zitalak izan daitezkeela esanez; beste batzuk, bisitatu behar duen herriaren izena aurretik ongi ikasi ez izanaren errespetu falta aipatzen dute; eta badago euskaldunek Argentinari eginiko ekarpen aberatsa aipatzen duenik, izen zail edo errazen kontuaz haratago.

Urdinarrain herriaren izena Urquiza generalaren laguntzaileetakoa izan zen Manuel Urdinarrain generalaren omenez jarria da. 



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia