euskalkultura.eus

Chivilcoy, Argentina. 'Beti Aurrera euskal etxeko kideek azken hilabetean egindako jardueren orden kronologikoari eutsiz, iragan maiatzaren 10ean Club Ceramican antolatutako urteko lehen afariak 400 bat pertsona bildu ziren. Euskal Etxeko kideek, dantzariekin eta gazte talde baten laguntzaz, elkarteko emakumeek prestatutako janaria zerbitzatzeaz arduratu ziren.

[Chivilcoyko Euskal Etxekoen urteko lehen afarian bildutako partaideen ikuspegi orokorra]

Tropicalísimo Fantasía orkestrak eta Jorge Destaville tango kantariak giroa animatu zuten. Azkeneko honek, gainera, ikusleen artean 'txalo zaparrada' berezia jaso zuela azpimarratu du Nelba Calonge de Letamendi Euskal Etxeko komunikatzaile eta zuzendaritza batzordeko kideak. Emakumeek eginiko mahai erdiko lore-apaingarriak mahai bakoitzeko andereen artean zozketatu ziren.

Euskal sukaldaritza ikastaroa

Euskal Herritik etorritako Susana Rioja Samaniego sukaldariak, Gabriela Cibelli gaztearen laguntzaz, euskal sukaldaritza ikastaroa eskaini zuen maiatzaren 16 eta 17an. Lehenengo egunean 60 pertsonak parte hartu zuten eta bigarrenean ia 80 inguratu ziren tailerrera. Partaide bakoitzak ikastaroan egindako errezeten bilduma exteratu zuen. Jardunaldia amaitzerakoan, antolatzaileek zenbait opari eta oroigarri eman zizkioten Riojari. Tailerrean egindako errezetetako batzuk Chivilcoyko Euskal Etxeko webgunean ikus daitezke.

[Susana Rioja sukaldariak euskal gastronomia ikastaroan egindako pintxoen irudia]

Susana Riojak beste zenbait jarduera burutu zituen Chivilcoyn, herria zein bertako euskal komunitatearen jarduna eta izaera ezagutzeko. Maiatzaren 16an, ostiral gauez, tango ikuskizun batean parte hartu zuen. Udaleko Kultur zuzendariak idazle chivilcoytar baten liburua oparitu zion. Biharamunean, La hora de los vascos irratsaioan parte hartu zuen euskal sukaldaritza eta bere ezaugarrietaz hitz egiteko.

Tango dantzagarrien gaua

Tango jarraitzaileak joan den asteko ostiralean, maiatzaren 30ean, bildu ziren dantza modalitate hau praktikatzeko. Juan Franciscone orkestrak giroa alaiturik, zentroko emakumeek etxean egindako enpanadak zerbitzatu eta euskal etxea abegikor aritu zen. Ekitaldian Bragado eta Alberti hirietatik etorritakoek ere parte hartu zuten eta ikusle guztien animazioak gaua alaitu zuen.

[Bikote ugari bildu ziren Chivilcoyko Euskal Etxeko egoitzan tangoa dantzatzeko (argazki multzoa Chivilcoyko Euskal Etxea)]

Lotura interesgarriak

Ekitaldien argazki gehiago Chivilcoyko Euskal Etxeko webgunean
www.centrovascochivilcoy.blogspot.com