euskalkultura.eus

Concordia, Argentina. Immigrantearen Erregina Probintzialaren hautaketa joan den larunbatean egin zen Uruguai ibaiaren ertzeko hiri argentinar honetan, hamar bat hautagai tartean. Euskal ordezkaria, Maria de los Milagros Castañeda Arletaz-ek bereganatu zuen 2011ari dagokion XVIII. edizio honetako koroa. Berarekin batera, hautatu zituzten María Agustina Esper González, siriar-libaniar komunitateko kidea, 18 urtekoa, 'Kultur Enbaxadari' gisa; Lehenengo Printzesa, Melina Paola Borda Gonzalez, uruguaitar ondorengoen ordezkaria, 17 urtekoa; eta Miss Atsegina, suitzar gizataldeko Maria Milagros Gaillard Preuss, 16 urtekoa.

Concordiako immigrante eta gizatalde komunitateen bilgarri den 'Inmigrante Unidos de Concordia' taldeak antolatzen duen programa aurreko asteko asteburuan hasi zen Suzien Martxarekin eta Hiriaren garapenari ekarria egin dioten immigranteentzako ziurtagiriak emate ekitaldiarekin; eta azkeneko asteburu honetan amaitu da, ostegunetik igandera muntatutako stand, gastronomia dastaleku eta kultur show eta emanaldiekin. Hor tartean, euskaldunak ere aritu dira janari- eta kultur-standarekin; eta bertako 'Gazte Lurra' taldeko dantzariek ere erakustaldia egin zuten, Lantzeko Inauteria aurkeztuz agertoki gainean.