euskalkultura.eus

Buenos Aires, Argentina. Iluntzeko zazpietan eman zitzaion hasiera apirilaren 27an Juan de Garay Fundazioak argitaratutako lau liburu berriren aurkezpenari. Fundazioaren izenean, Mauricio Goyenecheak ongi etorri hitzak zuzendu zizkion bildutako jendeari eta segidan, Jorge Beramendi irakasleak liburu bakoitzaren xehetasunak konpartitu zituen publikoarekin.

Hasteko, otsailean burutu zen Udako Euskal Unibertsitateko ikasleen egindako azken lanak biltzen dituen testuaz mintzatu zen Beramendi. “Universidad de Verano 2011 (Udako Euskal Unibertsitateko 2011ko azken lanak) liburuak euskal kulturari buruzko hainbat gai eskaintzen dizkio irakurleari”, azaldu zuen Beramendik. Jarraitzeko, Los Cuentos de Teresita (Teresitaren ipuinak) liburuaren txanda izan zen, eta oraingoan, Teresa Pastor idazlearen ilobek, Agustina eta Bernarda Marambio, izan zuten haien amonaren lanari buruz hitz egiteko ardura.

[Juan de Garay Fundazioak aurkeztu zituen lau liburuak (argazkia EuskalKultura.com)]

Ondoren, Carlos Irisarrik berak kontatu zien Adolfo Bioy Casares Aretora bertaratu ziren lagunei zertan datzan bere Cursillo de Lengua Vasca (Euskara ikastaro laburra). “Era didaktiko eta lagungarrian azaltzen ditut euskararen egiturak liburuxka honetan” adierazi du egileak. Atzoko aurkezpenekin bukatzeko, Luis Luquez-ek Aquellos Euskos, estos Vascos (Eusko horiek, euskaldun hauek) bere liburuan garatzen dituen euskaldunen historiaren puntu esanguratsuenak deskribatu zituen.

Azpimarratzekoa da euskal komunitateko ehun bat lagunek parte hartu zutela ekitaldi honetan, tartean Elvira Kortajarena Argentina, Brasil, Paraguai eta Uruguairako Euskadiko Ordezkaria.

Cordoba eta Chacoko idazleak

Cordoba probintziako Coronel Moldes herritik etorritakoa, 'Gure Zainak' euskal etxearen bultzatzaile nagusia den Marita Echave ere izan da aste honetan Liburu Azokan. Cocina vasca campesina ('Euskal baserrietako sukaldaritza' azpitituluduna) liburuaren egileak zer nolako garrantzia duen sukaldaritzak euskal kulturan azaldu zien hurbildu zitzaizkien bisitariei. Bide batez, testuaren aleak sinatu zituen Euskal Herriko standean.

[Angeles de Dios de Martina Dunken Argitaletxeko standean eta Marita Echave Euskal Herriko standean (argazkia EuskalKultura.com)]

Beste alde batetik, pasa den 23an Andrea Moch, andanzas de una artista (Andrea Moch, artista baten ibilerak) aurkeztu zuen Angeles de Dios de Martina idazle chacotarrak. Jende multzo polit bat bildu zen Dunken Argitaletxearen standean euskara eta euskaldunekin zein ezkerrarekin eta feminismoarekin engaiamendu handia izan zuen artista honen bizitzaren pasadizoak entzuteko.