euskalkultura.eus

Atzo abiatu zen Asier Vallejo Itsaso, Eusko Jaurlaritzako Kanpoan den Euskal Komunitatearentzako zuzendaria Uruguai aldera. Asteburuan Montevideon izango da eta bilerak egingo ditu herrialde honetako euskal etxeetako arduradunekin. Datorren astean Argentinara joan eta zenbait euskal etxe bisitatu eta apirilaren 25ean FEVAk Buenos Airesen egingo duen Urteroko Batzarrean parte hartuko du.

Donostia-San Sebastián. Asier Vallejo Euskal Komunitatearentzako zuzendaria bidaian da Uruguai eta Argentinara, Andoni Martin teknikariarekin batera. Asteburuan Montevideon izango da, eta Uruguaiko euskal etxeekin eta FIVUrekin bilduko da bertan. Datorren astean, aldiz, Argentinara egingo du jauzi, eta astean zehar herrialde honetako zenbait euskal etxe bisitatzeko aukera izango du.

Datorren asteko larunbatean, apirilaren 25ean, Vallejok FEVAren Urteroko Batzarrean parte hartuko du, Buenos Airesen. Argentinako euskal etxeen bilerara Oscar Alvarez Gila historialaria ere bilduko da, hango euskal komunitatearen memoria berreskuratu eta gordetzeko proiektu bat aurkezteko.

Era berean, FEVAren bileran hauteskunde partzialak egingo dira, federazioko hainbat kargu berritzeko, besteak beste, presidenteordetza.