Euskal Herritar eta Gizataldeentzako Zuzendaritzak lau bekadun berri izango ditu lankide

2012/05/04

Ezker-eskuin, Iñaki Goikoetxea (Gasteizen geratuko da), Shanti Arrieta (Argentinan), Mayte Galardi (Gasteizen) eta Miren Perez Eguireun (Estatu Batuetan)

PUBLIZITATEA

Euskal Herriko Agintzaritzaren Aldizkariak atzo osteguna maiatzaren 3ko zenbakian argitara emandako Kanpo Harremanetarako Idazkari Nagusiaren ebazpen baten bidez, Kanpoko Euskal Herritar eta Gizataldeentzako Zuzendaritzaren baitan arituko diren lau bekadunen izenak adierazten dira. 2012an eta 2013an Zuzendaritza horretan jarduteko puntuaketarik altuena lortu dutenak Lehendakaritzan Gasteizen (2k), Euskadiren Argentinako Ordezkaritzan (1ek) eta Estatu Batuetako dagokion euskal bulegoan (1ek) gauzatuko dute euren lana.

Vitoria-Gasteiz. Lau lizentziatu bekadunak Gasteizko Lehendakaritza eraikinean egoitza duen Kanpoan dauden Euskal Herritar eta Gizataldeentzako Zuzendaritzaren baitan garatuko dute euren jarduna, nahiz eta lehenengo oinarrizko formakuntza jaso ostean euretako bi Argentina eta Estatu Batuetara joango diren, jardun hori bertako Euskadiren Ordezkaritza edota euskal bulegoetatik jarraitzeko. Ebazpenean finkatutakoari jarraiki, lau onuradunak atzo bertan bertaratu ziren Gasteizko Lehendakaritzan eta ekin zioten honela Jaurlaritzan segituko duten ia bi urteko espezialiazio eta trebatze aldia.

Azken hilabeteotan egin den hautatze prozesuan notarik onenekin gailendu eta postuak eskuratu dituzten lau pertsonak honakoak dira (euren jarduna non garatuko duten adierazita):

Estatu Batuak
-Miren Pérez Eguireun

Argentina
-Shanti Benito Arrieta Manterola

Vitoria-Gasteiz
-Mayte Galardi Uribarri
-Iñaki Goikoetxea Arrufat

Atzerrian arituko diren bi pertsonei dagokienez, Argentinara doanaren kasuan, Euskadiren Argentina, Brasil, Uruguai eta Paraguairako Ordezkaritzaren egoitzan egingo du lan, Buenos Airesko Puerto Maderon. Estatu Batuetan arituko denak, egoitza New Yorken duen Estatu Batuak, Kanada eta Mexikorako Ordezkaritzaren baitan arituko da, nahiz eta fisikoki Boisetik jardungo duen, bertan datozen hilabeteetan zabalduko den euskal bulego berrian, Boise erdigunean. Bi kasuotan, oinarrizko formakuntza Gasteizen hartuta eta dokumentazio eta baimen aldetik bi herrialde horietan aritzeko beharrezkoak diren paperak tramitatu ondoren bidaiatuko dira euren behin-betiko destinoetara.

-Kanpo Harremanetarako Idazkari Nagusiaren Ebazpena