Buenos Aires, Argentina. ‘Mate ontziaren zuloa ia bezain zaharra den errezeta’ izenburua daraman tutorial moduko laburmetraia hau duela bi urte Argentinan bizi den Fernanda Sanjurjo Olavarria ikus-entzunezko egile uruguaitarraren proiektua da. Matea bezain riodelaplatatarra, askotan azaldu behar izan die Fernandak lagun atzerritarrei edari tradizional hau zer den. Hori izan zen laburmetraia sortzeko abiapuntua.
Egilearen hitzetan, “asmoa da errezeta mundu osoarekin konpartitzea, kultura partekatuaren kontzeptuan oinarrituta”, azaldu dio EuskalKultura.com-i. Ondorioz, orain artean hamasei hizkuntzatara itzuli du eta ehunetara iristeko heburua du.
Matea nola prestatzen den azaltzen duen laburmetraia Buenos Airesko Euskaltzaleak Euskaltegiko Mariana Arla, Julieta Gaztañaga eta Elsa Usandizaga ikasleek euskararatu dute, euren irakasleak lagun. “Proiektua", adierazten du bideoaren egileak, "irabazi asmorik gabeko ekimena da. Xedea da matearen erritualari buruz dagoen informazio ugariari beste harri koskor hau ekartzea”.
[‘Mate ontziaren zuloa ia bezain zaharra den errezeta’ laburmetraia euskaraz]
Lagun bati bidali
Komentarioa gehitu
