euskalkultura.eus

Cordoba, Argentina. “Euskal Herriko kultur ikurrak --euskara, dantzak eta musika-- benetako era ederrean lotzea lortzen du beti Agustín Alonsok, José Noé Fernández-ek, Franco Seghessok, Fernando Zabalzak eta Gaspar Jaurenak osatzen duten taldeak.

Eta 'Baietz' Taldeko kideek bezala, oztopoei gaina hartuta Cordoba hirian gure kultura euskalduna hedatzen jarraitzea erabaki dugun guztiok, publikoaren atxikimendua sentitu dugu uztailaren 3an Lautaro Tabernan egindako kontzertuan”, adierazi dio Elba Mocoroak EuskalKultura.com-i.

“Ez da hau arazoez mintzatzeko garaia: hau geure indarraren bizitasunaz eta indar euskaldunak musikak, dantzak eta engaiamenduak uztartuta ikusteak eta sentitzeak ematen duen pozaz hitz egiteko momentua da”, azaldu zuten bertara bildutako Gure Txokoa-ko zenbait kidek.

Euskal tresna tradizionalak egiten eta jotzen dituen talde euskal argentinar honen deia izan zen biltzaile. 'Baietz'-en kontzertuaren deiadarrak euskal cordobatarren umore on eta batzeko asmoa hedatu zuen hiriburu mediterraneoan.

['Txotx' Dantza Taldeko dantzariek ere hartu zuen parte kontzertuan]

Hasteko, mutil boskoteak albokarekin errepertorio tradizionaleko pieza batzuk jo eta egungo abestiak ere eskaini zizkieten gerturatutakoei. Tartean Oinez abestia, Jaunarenak idatzitakoa. Txalapartak eta txistuak bat egin zuten Baztango Sagar Dantza interpretatzeko. Ondoren eta bakarlari gisa, musikari bakoitza egurra eta burdinaren soinuetan barneratu zen.

Xirulak eta Ttun ttun-ak Iparralde, Nafarroa Behere eta Zuberoako dantzak ekarri zituzten; eta 'Txotx' Dantza Taldeko dantzariek Txilibrinen jota eta Porrusalda, eta Lantzeko Inauteria interpretatu zituzten. Aipatzekoa da ere Argentinaren Bigarren Mendeurrena dela eta argentinarrentzat hain garrantzitsua den urte honetan chacarera bat jo zutela, euskal tresna tradizionalez, 'Baietz' Taldeko kideek.

“Benetako ospakizuna izan da guretzat”, aitortzen zuen Mocoroak, “euskara eta euskal kultura Cordoban bizirik dauden seinale”.