Euskal editoreak pozik aurtengo Frankfurteko Azokarekin: euskal literaturak interes handia piztu du, baita kalean ere

Frankfurteko Liburu Azokaren azken ediziorekin gustura agertu dira euskal editoreak eta euskal literaturak gero eta jakinmin gehiago sortzen duela baieztatu ahal izan dute Alemaniako topaketa honetan. Aurten euskal idazleek --Arantxa Urretabizkaia, Edorta Jimenez, Xabier Montoia...-- egin dituzten aurkezpen eta irakurraldiek azokaren esparrua gainditu dute eta hiriko kultur eskaintzarekin bat egin dute Café Exzess aretoan eraturiko Euskal Literatur Gauarekin.

Frankfurteko Liburu Azokan izan diren 20 euskal argitaletxeeteko arduradunak pozik agertu dira bidaiaren emaitzarekin eta eurek aurkeztutako euskarazko eta gaztelerazko liburuekiko interesa urtetik urtera gora doala adierazi dute. Argitaletxeek jakinarazi dutenez 'Frankfurtera joan diren etxeek eskubide salmentarako zein erosketarako eginiko hitzorduetan emaitza oso onak' lortu dituzte.

Bestalde Azokak alemaniar publikoak euskal literaturarekiko duen interesa neurtzeko aukera eman du. Horren adibide ona, iragan ostiral gauean Cafe Exzess aretoan egindako Euskal Literatur Gaua izan da. Antolatzailea Zubiak-Baskische Bibliothek bilduma izan zen, euskal literatur lanak alemanez argitaratzen dituen bilduma. Ekitaldira 150 lagundik gora bildu ziren, Martin Petrusek, Frankfurteko Euskal Ikasketa Zentruko koordinatzaileak EuskalKultura.com-i baieztatu dionez.

Aktualitatea, musika eta literatura

Lehen hizlaria Ingo Niebel, alemaniar historialaria eta Gara egunkariko Alemaniako berriemailea, izan zen. Euskal Herriko egungo egoerari buruz aritu zen Niebel. Jarraian Raul Zelik idazle eta itzultzaileak Joseba Sarrionandiaren 'Lagun izoztua' liburuaren pasarteak irakurri zituen. Ondoren Edorta Jimenez eta Arantxa Urretabizkaia idazleek euren lanak --'Kilkerren Hotsak' eta 'Koaderno gorria' hurrenez hurren-- aurkeztu zituzten. Zubiak bilduman alemanez argitaratu dituzte bi elaberriok. [Ezkerreko irudian entzulegoa Café Exzessen egin zen Euskal Literatur Gauan (argazkia MPetrus)]

'Ekitaldiari euskal-alemaniar ikutu handiagoa emateko, Hemendikan taldeak euskal abesti herrikoiak eskaini zituen aurkezpenen tarteetan', azaltzen du Petrusek. Gauan euskal gastronomiak ere lekua izan zuen, pintxo, txakolin eta sagardo dastaketa batekin. Ekitaldia Zubiak bildumarentzako 'aurkezpen ezinhobea' izan zela esan dute antolatzaileek. Izan ere jendeak goizaldeko ordu txikiak arte gozatu zuen euskal literatura, gastronomia eta musika uztartu zituen giroaz. 'Ekitaldi hauekin Alemania eta Euskal Herriaren arteko harremanak bizkortu nahi ditugu', azaldu du Martin Petrusek.

Honakoak dira euskal kulturak Alemanian izango dituen hurrengo hitzorduak: Berlingo Expolingua azoka (azaroaren 16-18) eta Kimuak programako Euskal Laburmetraien Erakustaldiak Wiesbaden-en eta Frankfurten azaroaren 22an eta 25ean (bi euskal zinemagile ere bertan izango dira aurkezpena egiteko).

Lotura interesgarriak

Euskal literatura Frankfurteko Azokan
EuskalKultura.com-en argitaratua 2007ko urriaren 10ean

Urretabizkaiak eta Jimenezek lanak aurkeztuko dituzte Frankfurten
EuskalKultura.com-en argitaratua 2007ko urriaren 3an

euskalkultura.eus

Albisteak

Euskal editoreak pozik aurtengo Frankfurteko Azokarekin: euskal literaturak interes handia piztu du, baita kalean ere

Irakurrienak

Azken komentarioak