euskalkultura.eus

Elko, Estatu Batuak. Prentsari emandako oharren irakurtzen dugu bertako euskal historia protagonista izango dela bihar Elkoko California Trail Center, edo Ekialdetik Kaliforniara zeraman ibilbidea (Elkotik eta Humboldt konderritik bete-betean pasatzen zena) ikertu eta jende aurrean aurkezteko sortutako kultura zentro edo etxe honetan. Berrogei urte atzera eginez, 1970 aldean, euskaldunen immigrazioa AEB Mendebaldean artzain izateko bere amaierara iristen hasi zen. Sei bat urtetan, ordezkapenik heldu ez zenez Euskal Herritik, euskal artzainen kopurua ehuneko hamalaura jaitsi zen, eta geroztik gero eta gehiago egin du behera.

Honetaz guztiaz mintzatuko da bihar Kent McDoo, euskaldunek eremu zabal honetara eta bereziki Elko hiriari eta Humboldt konderriari eginiko ekarpena aipatuz, bertako paisaian utzitako markak eta honen guztiaren zergatiei buruz jardunez. 'Euskal artzainak Estatu Batuetan: garai baten amaiera' izenburuko aurkezpena ostegunean, martxoaren 18an egingo da, arratsaldeko zazpietan California Trail Center izenekoaren egoitzan, sarrera kitorik. Ekimena kultura etxe horrek bertako historia eta kultura herrikoia jendaurretzen daraman ahaleginako parte da.

California Trail edo Kaliforniarako bidearen Interpretazio Zentroa Elkotik zortzi kilometro mendebaldera dago kokatua, 80 zenbakia daraman estatuarteko autobidean, Hunter 202 irteera hartu behar dela. Eskola taldeentzako eta bestelako erakundeentzako bisitak eskaintzen dira. Kontaktubidea Zentroko zuzendari David Jamiel medio egin daitezke (775) 482-4718 zenbakian; edo Gary Koy ranger-arekin mintzatuz (775) 934-2467 zenbakian edo, e-mailez, gary_koy@blm.gov helbidera idatziz.