euskalkultura.eus

Corpus Christi, Argentina. Argentinaratu zirenean, euskaldun askok Mesopotamia argentinarra hautatu zuten bizileku. Parana eta Uruguai ibaiek mugatzen duten eskualde honetan, euskal etxe bat baino gehiago dago, tartean Misiones probintzian, Corpus Christiko Eusko Etxea. Bertako euskaldunak ere aritu dira Bigarren Mendeurreneko ospakizunetan partaide eta Argentinako bandera eta ikurriña jaso zituzten herriko Udaletxeak antolatutako ekitaldian. Horretaz gain, euskal elkarteak komunitateari begirako buletin bat argitaratu zuen efemeridea zela eta. Ekainean, gainera, lagunen arteko bazkaria gauzatuko da karia horretara, detaileak zehazteke, Corpus Christi-ko euskal etxean.

Mesopotamiatik atera barik, Victoria herrira joko dugu. Bertan, Argentinaren Bigarren Mendeurrena ez ezik, hiriaren beraren Bigarren Mendeurrena ere ospatu da maiatzean. Victoriako euskaldunek ongi kontatzen dutenaren arabera, “1810ean, Salvador Joaquín de Ezpeletak jarri zuen Victoria hiriko hazia La Matanza izeneko oratorioa sortu zuenean; horrekin batera, duela bi mende altxatutako oratorio hartan Arantzazuko Ama Birjina gurtzen hasi zen eta gaur egun, Gipuzkoako patroia dena Victoriakoa ere bada. Herrian eta herritarrengana izan zuen eraginagatik, Ezpeleta Victoriaren sortzaile izendatu zuen herriko historiak”, azaltzen dute.

[Fabian Zorzabal, Zulema Urcola eta Elbio Arce Victoriako Haritz Euskal Etxeko kideek plaka oroigarri bat eman zioten hiriari]

Jai bikoitz honetan, Haritz Euskal Etxeko arduradunek Ezpeletaren omenezko oroitarriaren inaugurazioan izan ziren. Elvira Kortajarenak, Euskadiren Argentinako ordezkariak, lagundu zituen omenaldi honetan baita herriko parrokian ospatu ziren elizkizunetan ere. Elizaren aurrean, Victoriako alkate César Nelson Garcilazok Euskal Etxeak eskainitako plaka oroigarri bat desestali zuen. Cristina Fernandez Argentinako presidentea eta Sergio Daniel Urribarri Entre Ríos probintziako gobernadorea ere bertaratu ziren Victoriara. Ekitaldi ofiziala bukatuta, arratsaldean, Haritz Euskal Etxeko kideek, Kortajarenari lagunduta, Victoriako leku garrantzitsuenak bisitatu zituzten.

[Noemi Osuna, Elvira Kortajarena, Fabian Zorzabal eta Zulema Urcola Ezpeletaren omenezko oroitarrian]

Buenos Aires probintziara itzuliz, Tandilgo 'Gure Etxea' Euskal Etxeko kideek jakinarazi digute haiek ere hartu zutela parte Bigarren Mendeurrenaren kabalkadan. Dantzariak, abesbatzako kideak eta oro har euskal etxeko partaideak hiriko kaleetan ibili ziren beste gizatalde batzuetako ordezkariekin.

Pixkar iparralderago, Iraultzaren Bigarren Mendeurrenaren bezperako gauean Chivilcoyko zerua su artifizialez argitu zen. 'Beti Aurrera' Euskal Etxeko kideak izan ziren horren lekuko. Rodolfo Medero maisuaren orkestrak emandako kontzertura ere joan ziren euskaldunak, beti urtemuga berezi hau ospatze aldera. Bukatzeko, herriko Te Deum-en eta ekitaldi ofizialetan ere hartu zuten parte Euskal Etxeko gazteek eta batzordeko lagunek.

[Maiatzaren 25eko bezperako gauean Chivilcoy-ko zeru argitua]