euskalkultura.eus

Bartzelona, Katalunia. Bartzelonako Euskal Etxean iragan astean egin zen Europako euskara irakasleen bilerak emaitza ona izan zuen eta, lan praktiko asko egiteaz gain, etorkizunean harremana sakontzeko eta komunikazio sare bat osatzeko oinarriak jarri ziren bertan. Hamabost bat partehartzaile izan ziren bileran; izan ere, Madril, Bartzelona, Valentzia, Paris eta Berlingo euskal etxeetako irakasleei batu egin zitzaizkien azken unean Bartzelonako Unibertsitate Autonomoko eta Hizkuntz Eskola Ofizialeko irakasleak ere. HABEren ordezkaria Euskara Munduan programako koordinatzaile Kinku Zinkunegi izan zen eta bigarren egunean Iñaki Uribe HABEren zuzendaria batu zitzaien.

Bi eguneko topaketak bi arlo izan zituen. Batean, irakasleek esperientzia trukaketa egin zuten eta eskarmentu handiko euskal etxeetakoek --adibidez, Madril, Bartzelona eta Pariseko euskal etxeetako ordezkariek-- euren lanaren berri eman zieten elkarte berri edo txikiagokoei. Elkarte berri horien artean aipagarria da Valentziako Euskaltzaleok elkartearen kasua; izan ere, elkarte nahiko berria izanagatik, 30 euskara ikasle ditu jada. "Euskaltzaleok-etik lau irakasle etorri ziren, eta horietako hiru euskal etxean bertan euskara ikasitakoak direla azpimarratu behar da", adierazi dio EuskalKultura.com-i Kinku Zinkunegik. 

Bilera monografikoak

Bileraren bigarren partean irakasleek proposaturiko gai praktikoak jorratu ziren, adibidez hiztegia nola aberastu, klaseetarako informazio osagarria eskuratzeko medioak... Hala ere, partehartzaileen iritziz, bileran ez zen arlo hauek guztiak sakonean jorratzeko astirik izan, eta datozen topaketetarako arlo bakoitza era monografikoan lantzea proposatu zen.

Ildo beretik, bilerak martxoan egin ordez urrira aurreratzea proposatu zuten partehartzeileek, horrela ikasturtea hasten duten irakasle berrientzako lagungarrriago izan daitezen. Pariseko Eskual Etxeak bere egoitza eskaini zuen hurrengo bilera egiteko, aurtengo urriaren 19tik 21era.

Azkenik, irakasleek euren arteko harremana urte osoan zehar mantentzeko bideak sustatzea ere eskatu zuten, eta HABEko arduradunek komunikazio sare hau osatzeko ardura bere gain hartu zuten.