euskalkultura.eus

euskal diaspora eta kultura

Albisteak rss

Etxepare Euskal Institutuak "Excellence in Basque Studies" udako ikastaroa egiteko bekak eskaintzen ditu

2015/06/29

Mariasun Landa idazlearen lana izango da aurtengo "Excellence in Basque Studies" ikastaroaren ardatza
Mariasun Landa idazlearen lana izango da aurtengo "Excellence in Basque Studies" ikastaroaren ardatza

PUBLIZITATEA

Udako Ikastaroen barne egingo da, aurten ere, "Excellence in Basque Studies" ikastaroa, Etxepare Euskal Institutuak sustatuta. Ikastaroaren helburua zera da, Etxeparek nazioarteko hainbat unibertsitatetan dituen euskal irakurleak --edo irakurle izan nahi dutenak-- trebatzea. Ikastaroa uztailaren 8tik 10era egingo da Donostian, eta Etxeparek bertan parte hartu nahi dutenei bekak eskaintzen dizkie.

Donostia-San Sebastián. Bosgarren urtez jarraian, Udako Ikastaroek Excellence in Basque Studies prestakuntza ikastaroa eskainiko dute, Etxepare Euskal Institutuak eta EHUk lankidetzan antolatuta. Ikastaroaren helburua atzerriko unibertsitateetan Euskara eta Euskal kultura irakasteko prestakuntza eskaintzea da, eta aurten Mariasun Landa haur eta gazte literaturako idazle euskalduna omenduko du.

Etxeparek bertan parte hartu nahi dutenei laguntzeko beka batzuk jarri ditu eskuragarri, eta horiek eskuratzen dituztenek ikastaroaren matrikula ordaintzeko laguntza jasoko dute, kasu batzuetan osorik. Bekak eskuratzeko, jarri harremanetan Etxepare Euskal Institutuarekin, k-galartza@etxepare.eus e-postaren bitartez.

Excellence in Basque Studies V ikastaroa uztailaren 8tik 10era egingo da, Donostiako Miramar Jauregian. Institutuko Euskararen Sustapen eta Hedapenerako zuzendaria Mari Jose Olaziregiren zuzendaritzapean egingo da ikastaroa eta Mariasun Landa idazlearen lana izango du ardatza. 

Programak haur eta gazte literatura, genero ikasketak, irakurzaletasuna garai digitalean edo gizarte eleanitzek idazleari sortzen dizkioten erronkak izango ditu aipagai; besteak beste, Landak urtetan jorratu dituen atalak. Mintegi praktikoetan, bestalde, euskal sinbologiari, unibertsitatean euskara irakasterakoan sortzen diren zailtasunei aurre egiteko tresnei eta irakasteko erabilgarri izan daitezkeen denetariko baliabideei erreparatuko diete.

Uztailaren 9an, bestalde, publiko orokorrari zabalik izango den irakurketa literarioa izango da Donostiako Aquariumean, Mariasun Landarekin solasean izenburupean. Bertan Bernardo Atxaga, Juan Kruz Igerabide, Patxi Zubizarreta, Miren Agur Meabe, Miquel Desclot eta Fina Casadelrrey idazleek esku hartuko dute, zuzenean marrazkiak sortuko dituzten Antton Olariaga, Elena Odriozola eta Jokin Mitxelena ilustratzaileekin batera; Juantxo Zeberio musikaria lagun izango duten pianoan.

Ikastaroaren egitaraua, hemen.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia