euskalkultura.eus

Vitoria-Gasteiz. Egungo Jaurlaritzak aurrekoari gauzak korrika eta presaka egin izana leporatzen dio, "bestela ez baita ulertzen honelako errore eta akatsak" egin izana. Hamar langile kontratatzeko haiek hasitako prozedimentua errekurritu egin zuen LAB sindikatuak eta horren zain dago Kultura saila bere ardurapean kokatzen den institutua behingoz abian ipintzeko.

Miren Azkarate aurreko Kultura sailburuaren azkeneko hilabeteak ziren. Presak edo erraz ulertzen ez diren zergatiak medio, deialdiko lanpostuetan ahaztu egin zitzaien ingeles hizkuntzaren eskakizunak ipintzea, eta hori, deialdia presaz egin eta aste batzuk eta gero zuzendu behar izan zuten, presak alferrikakoak bihurtuz. Bigarren akats bat ere egin zuten, soldaten zenbatekoa ez baitzuten ongi ezarri, eta hori ere zuzendu behar izan baitzen, buletinean argitaratu ondoren.

Zein den egoera egun? Institutuak aurrekontua badu, baita behin-behineko egoitza ere [behin-betirakoa izango duen Tabakaleraren eraikin barneko egoitza bukatu arte, Donostiako Prim kalearen 7an egongo da, horretarako egokitze lanak bukatuta eta haltzariak ia sartzen ateetatik]. Langileak falta dira, hamar pertsonak kontratatzearena, LABek ipinitako errekurtsoaren emaitzen zain.

Eta zuzendaria izendatzea. Euskal kultur munduko pertsona bat izango dela pentsatzen da, gutxienez elebiduna. Institutuak, izan ere, Euskal Autonomi Erkidegoan euskaraz zein erdaraz egiten den kulturaren zabalkundea dauzka helburu eta lan esparru.

Gauzak honela, esku artean dauden datak, erakundea urte erdialderako abian jartzea lirateke, behin errekurtsoarena erabakita, zuzendaria izendaturik. Etxeparek hasieran bere gain hartuko dituenak, besteak beste: munduan ematen diren --gehienbat euskal etxeak bitarteko-- euskara eskolak koordinatzea, nazioartean hainbat unibertsitateetako euskara eta euskal kultura irakurletzak kudeatzea, nazioarteko kultur eta hizkuntz azoketan parte hartzea, Kimuak eta gisako proiektuekin aurrera egitea eta oro har nazioartean euskara eta euskal kultura --hau euskaraz zein gaztelaniaz egina-- sustatzea.