euskalkultura.eus

Rocklin, AEB. Ipar Ameriketako Euskal Etxeen Erakundeak (NABO) urtero ospatzen duen Kantari Egunak 300 lagundik gora bildu zituen joan den urriaren 9an Rocklinen, Kalifornian. Euskal musikaz gozatzera etorri ziren gehienak, baina baziren aukera probestu eta taula gainera igotzea erabaki zutenak ere. Izan ere, hori da Kantari Egunaren ezaugarrietako bat, parte hartu nahi duen edonori irekitako kantaldia baita.

Kaliforniatik eta Nevadatik 14 kantari eta bertsolari bildu ziren bertara eta saio polita egin zuten entzuleen aurrean. Eurekin batera aritu ziren Erramun Martikorena baxenafartarra --bere arreba Angéle-rekin-- eta Mikel Markez gipuzkoarra, Euskal Herritik propio etorritako gonbidatu bereziak. Martin Etchamendy izan zen kantaldiaren aurkezlea. 

NABOren bilkura

Eguneko jarduerak goizean goiztik abiatu ziren, NABOren Udazkeneko Bilkurarekin. AEBetako euskal etxeetako ordezkariek parte hartu zuten bilkura honetan, eta lana egin ostean, bat egin zuten jaiarekin. Egitarauko hurrengo hitzordua mus txapelketa zen. Mikel eta Jon Vizcay anaiak izan ziren irabazle; Jean Pierre Goyhenetche eta Arnaud Bidondo txapeldunordeak. Bi bikoteek garaikurra eta saria --dirutan-- jaso zuten.

[Mus txapelketako partidetako bat (argazkia RocklinEE)]

Iparreko Ibarra taldeko dantzariek erakustaldia eskaini zuten, Hartza taldeko kideekin batera. Hartza Kaliforniako dantza talde desberdinetako partaideek osatutako konpainia da. "Erakustaldi bikaina eman zuten", adierazi dio harro EuskalKultura.com-i du Allyn (Goyenetche) Terpstrak, euskal etxeko sortzaile eta antolakuntzako kideak. Arrakastatsua izan zen baita ere txinga txapelketa, gizon zein emakumezkoen kategoriatan partaidetza handia izan baitzuen.

Dantzari espontaneoak

Indarrak berreskuratzeko, partehartzaileak afarira bildu ziren. Barbakoan prestatutako menua izan zen dastagarri: arkumea eta oilaskoa, pìperrada, babarrunak, entsalada, gazta eta euskal pastela (izozkia haurrentzat).

[Lan ederra egin zuten haragia erretzen (argazkia RocklinEE)]

[Afarira 300 bat lagun bildu ziren (argazkia RocklinEE)]

Gau partean Jean Flesher, Rene Caballero eta Christian Iribarren musikariek, Mikel Markez kantaria lagun zutela, dantzaldirako musika jarri zuten. Kantu eta kantu artean, dantza taldeetako haurrek girotu eta euren kabuz euskal dantza erakustaldi inprobisatua eskaini zuten, nagusien txalo eta irri artean. Haur, gazte eta bihotzez gazte, giro ederrean bukatu zuten denek gaua.