euskalkultura.eus

Donostia, Gipuzkoa. Donostia eta Bilbon egingo dira aurten Erbesteari buruzko Nazioarteko X. Kongresuaren baitan antolatutako hitzaldiak. Hamaika Bide elkarteak eta Deustuko Unibertsitateak antolatutako mintegia urriaren 5ean hasiko da eta 8ra arte iraungo du. Ponentziak Deustuko Unibertsitateak Donostian eta Bilbon dituen egoitzetan izango dira eta baita Donostiako Koldo Mitxelena Liburutegiko aretoan ere.

Hamargarren mintegi honen izenburua 'Erbestean bizitakoen testigantzak' da eta aztertu nahi da erbesteratuek, lehen pertsonan, zuzenean, eskutitza edota egunarietan idatzita utzitako euren testigantzak. Erbesteratuen haurtzaroa eta jasotako hezkuntza aztertuko da, baita Diasporako zenbait politikoren diskurtsoak eta idazle errepublikarren lanak. Euskaraz idatzitako zenbait eskutitza tartean. Baroja, Orixe, Irujo, Gurrutxaga, Manu de la Sota, Elizondo, Zaitegi, Ibiñagabeitia, Ibarruri, Aurora Arnaiz, María Luisa Elio, Semprún, Mª Teresa León, Champourcin, Camprubí, Chacel, Blanco Aguinaga edota Agirre aipatuko dituzte besteak beste hizlariek euren agerraldietan. Zenbait kasutan pertsonaia ezagun hauen inguruko datu berriak ezagutaraziko dira.

Honako adituek osatzen dute aurtengo Batzorde Zientifikoa: Xavier Apaolaza (EHU), Manuel Aznar Soler (UAB), Gregorio Arrien, Jose Angel Ascunce (Deustuko Unibertsitatea), Nigel Dennis (Saint Andrews Unibertsitatea, Erresuma Batua), Juan Cano Ballesta, Jose Manuel Lopez de Abiada (Bernako Unibertsitatea, Suitza), Gabrile Morelli (Milango Unibertsitatea, Italia) eta Serge Salaün (Paris III Unibertsitatea, Frantzia). Batzordeko kideez gain, 40 hizlari inguru ariko dira erbesteaz mintzatzen.

Horietako bat Argentinako Mar del Platako Denak Bat Euskal Etxeko kide den Mauro Vitullo izango da. Honek 'Mauricio Flores Kaperotxipi: Euskal artearen enbaxadorea Mar del Platan' lana aurkeztuko du. Vitullok Kaperotxipik berak idatzita utzitako Gerra Zibilean bizitako testigantzak jaso ditu besteak beste.