'Emak Bakia' filma, arrakastatsu San Frantziskon; hurrengo emanaldiak Liman eta Sydney-n

2013/05/23

Erdian, bideoa eskuan, Oskar Alegria zuzendaria, eta Basque Educational Organization elkarteko Leon Sorhondo, Philippe Acheritogaray, Marisa Espinal, Yvonne Hauscarriague eta Nicole Sorhondo (argazkia SFBCC)

PUBLIZITATEA

Nazioarteko ibilbide polita egiten ari da Oskar Alegria iruinsemearen "Emak Bakia" dokumentala. Azken emanaldiak Kalifornia aldean egin dira; hasteko San Francisco International Film Festival delakoan, eta ondotik, hiri estatubatuarreko Basque Cultural Center-en. Dokumentalak Lapurdiko kostaldeko etxe misteriotsu baten bila eginiko bidaia du abiapuntu, eta zuzendaria pozik agertu da euskal etxeko emanaldira Iparraldeko euskaldun asko bildu zirelako. Hurrena, Liman eta Sydney-n izango da ikusgai.

San Frantzisko, AEB. "Emak Bakia" dokumentala Kalifornia aldean izan da birritan hil honetan, lehenik San Francisco International Film Festival zinemaldian, eta ondotik Basque Cultural Center elkartean, eta bietan harrera bikaina izanik.

Maiatzaren 4, 5 eta 6an Oskar Alegria zuzendari nafarraren dokumentala ikusgai izan zen SFIFF zinemaldi kaliforniarrean, hiru emanaldirekin. Zuzendaria bera saioetan izan zen eta aipagarria da hiruetan aretoa jendez mukuru izan zela eta emanaldi osteko solasaldiak 40 minututik gorakoak izan zirela. Zuzendariaren esanetan, harrera "ikaragarria" izan zuen lanak eta zenbait ikuslek birritan eta hirutan ere ikusi omen zuten. Horietako bat AEBetako zine kritikari bat izan zen, eta, Alegriak EuskalKultura.com-i azaldu dionez, Boisen Euskal Zinemaldi bat antolatzekotan dira biak.

San Frantziskotik Vancouver-eko DOXA Documentary Film Festival zinemaldira joan zen filma, eta handik bueltan San Frantziskora, maiatzaren 17an Basque Cultural Center-en egin zen emanaldira. Euskal etxeko aretoa bete egin zen emanaldirako. Bertako euskaldun asko Iparraldekoen ondorengoak dira eta horrek biziki poztu zuen zuzendaria, dokumentalaren muina Lapurdin gertatzen da eta.

Basque Educational Organization elkarteko Marisa Espinalek abiarazi zuen emanaldia, euskal zinemari buruzko aurkezpen batekin eta, ondoren, Alegria luze eta zabal solastu zen ikusleekin, dokumentalaren nondik-norakoak azalduz.

Hurrengo emanaldiak honakoak izango dira:

Maiatzaren 30a-ekainaren 8a: Podgorica-Montenegro / Underhillfest.
Ekainaren 3, 4, 5 eta 6: Lima / Festival FIACID.
Ekainaren 10a eta 15a: Sydney / Sydney International Film Festival.

Bertako euskal elkarteetako batekoa edo hiri hauetako euskalduna bazara, jakin ezazu filmaren zuzendaria prest dela emanaldi bereziren bat antolatzeko eta bere lana euskaldunen aurrean bereziki aurkezteko.

Dokumentalari buruzko informazio gehiago, hemen.