euskalkultura.eus

Donostia, Gipuzkoa. Joan den larunbatean, azaroak 15, izugarrizko ikuskizuna bildu zen Elgoibarko plazara. Texas-tik etorritako bi 'indartsu' nor baino nor aritu ziren kirolari euskaldunekin National Geographic telebista kate entzutetsuarentzat saio bat --'Superhumans' izenekoa-- grabatzen. Elgoibarren bost probatan saiatuz neurtu zituzten indarrak euskaldunek eta amerikarrek: aizkoran, harri-jasotzen, trontzan, txingetan eta korrika. Aurrez, beste erakustaldi batzuk egin zituzten: lasto-altxatzen, ingudearekin edota gurdi-eramaten, esaterako.

Paul eta Craig Pumphrey anaiak indartsu profesionalak direla esan daiteke. Borroka librean arituak, arte martzialetan hainbat sari irabazi izan dituzte eta beren ikuskizunetan eskuarekin adreiluak eta antzekoak apurtzen aritzen dira. Munduan zehar leku ezberdinetako kiroletan aritu ostean, egun batzuk emango dituzte Euskal Herrian bertako kiroletan saiakera egin, eta kirolok ezagutzera emateko. Segan ere aritzekotan dira, Tomas Aldasororekin, Zaldibian, baita arraunean ere Urdaibairekin, Bermeon.

Euskal Herriko pentatloia bukatuta, bi anaien ikuskizuna etorri zen, National Geographic-erako Elgoibarren grabaturiko lehen irudiak izango zirenak. Herri kiroletan hain ondo moldatu ez arren, indartsuak direla behintzat demostratu nahi zieten Elgoibarren bildutakoei. Craig hasi zen, zartagin handi bat eskuan hartu eta publikoarengana hurbilduz, plazan zegoen gurdira igo, eta kartoi bat balitz bezala bildu zuen. Sekulako txaloak jo zizkioten bertaratutakoek. Ondoren, harri xafla multzo handia prestatu zieten plazaren ertz batean. Kolpe bakarrean puskatu zituen Craigek guztiak, eta ondoren beste multzo bat puskatu zuen Paulek. Ez dute alferrik indartsu fama. Beso bakarrarekin hainbat material puskatzen munduko errekorra baitu Paulek.

Lotura interesgarriak

-Bideoak, argazkiak: Elgoibarko Barren aldizkariko webgunean